ᱡᱟᱹᱱᱩᱢᱰᱤᱦ ᱟᱹᱛᱩ ᱨᱮᱫᱚ ᱟᱹᱲᱤ ᱨᱟᱹᱥᱤᱼᱨᱟᱹᱥᱤ ᱴᱚᱞᱟ ᱢᱮᱱᱟᱜᱼᱟ ᱡᱤᱞᱤᱧ ᱛᱮ ᱜᱟᱸᱰᱚ ᱛᱮ ᱠᱩᱞᱦᱤ ᱢᱮᱱᱟᱜᱼᱟ ᱟᱛᱚ ᱵᱚᱞᱚᱜᱚᱫᱚᱜ ᱡᱚᱡᱚᱢ ᱱᱟᱠᱷᱟ ᱨᱮ ᱢᱤᱫ ᱦᱩᱰᱤᱧᱦᱩᱰᱤᱧ ᱜᱷᱟᱨᱚᱡᱽ ᱢᱮᱱᱟᱜᱼᱟ ᱚᱱᱟ ᱜᱷᱟᱨᱚᱡᱽ ᱨᱮᱫᱚ ᱯᱮ ᱦᱚᱲ ᱜᱮ ᱢᱮᱱᱟᱜ ᱠᱚᱣᱟ ᱢᱤᱫ ᱵᱟᱹᱵᱩ ᱜᱤᱫᱽᱨᱟᱹ ᱩᱱᱤᱭᱟᱜ ᱧᱩᱛᱩᱢ ᱫᱚ ᱵᱩᱫᱷᱨᱟᱹᱭ ᱟᱨ ᱮᱸᱜᱟᱛᱼᱟᱯᱟᱛ ᱜᱮ ᱾ ᱵᱩᱫᱷᱨᱟᱹᱭ ᱫᱚ ᱯᱩᱱ ᱥᱮᱨᱢᱟ ᱩᱢᱮᱨ ᱦᱩᱭ ᱮᱱ ᱛᱟᱭ ᱠᱷᱟᱱ ᱥᱟᱹᱜᱤᱧ ᱟᱥᱲᱟ ᱨᱮᱠᱤᱱ ᱵᱷᱩᱨᱛᱤ ᱠᱟᱫᱤᱭᱟ ᱵᱮᱥ ᱴᱷᱤᱠ ᱯᱟᱲᱦᱟᱣ ᱮ ᱥᱮᱲᱟ ᱫᱟᱲᱮᱭᱟᱜ ᱟᱜᱟᱢ ᱫᱤᱱ ᱨᱮ ᱪᱟᱠᱨᱤ ᱧᱟᱢ ᱱᱟᱯᱟᱭ ᱛᱮ ᱟᱹᱥᱩᱞᱚᱜ ᱟᱨ ᱮᱸᱜᱟᱼᱟᱯᱟ ᱦᱚ ᱥᱩᱠᱷ ᱨᱮ ᱫᱚᱦᱚ ᱫᱟᱲᱮᱭᱟᱠᱤᱱᱟ ᱚᱱᱟ ᱦᱩᱫᱤᱥ ᱠᱟᱛᱮ ᱟᱹᱠᱤᱞ ᱪᱷᱟᱨᱟᱣ ᱞᱟᱹᱜᱤᱫ ᱟᱹᱠᱤᱱ ᱠᱷᱚᱱᱟᱜ ᱯᱷᱟᱨᱟᱠ ᱨᱮᱠᱤᱱ ᱫᱚᱦᱚ ᱠᱮᱫᱮᱭᱟ ᱾ ᱵᱩᱫᱷᱨᱟᱹᱭ ᱮᱸᱜᱟᱛᱼᱟᱯᱟᱛ ᱫᱚ ᱵᱟᱹᱫᱼᱵᱟᱹᱭᱦᱟᱹᱲ ᱪᱟᱥᱟᱼᱵᱟᱥᱟ ᱛᱮ ᱢᱟᱱᱮ ᱢᱚᱜᱚᱝ ᱠᱚ ᱛᱟᱹᱠᱤᱱᱟ ᱜᱟᱰᱟ ᱟᱲᱮ ᱢᱮᱱᱟᱜ ᱠᱷᱮᱛ ᱨᱮᱫᱚ ᱟᱹᱞᱩ, ᱵᱮᱸᱜᱟᱲ ᱟᱨ ᱠᱩᱲᱪᱟ ᱮᱢᱟᱱ ᱛᱮᱠᱤᱱ ᱪᱟᱥᱟ ᱯᱮᱨᱮᱡ ᱠᱟᱜᱼᱟ ᱟᱹᱠᱤᱱ ᱫᱚ ᱛᱤᱱᱟᱹᱜ ᱠᱤᱱ ᱡᱚᱢᱟ ᱵᱷᱟᱞᱟ ᱟᱫᱚᱢ ᱫᱚᱠᱤᱱ ᱟᱹᱠᱷᱨᱤᱧᱟ ᱟᱨ ᱠᱟᱹᱣᱰᱤ ᱠᱤᱱ ᱫᱚᱦᱚ ᱡᱚᱜᱟᱲᱟ ᱵᱩᱫᱷᱨᱟᱹᱭ ᱥᱮᱪ ᱠᱷᱟᱨᱪᱟ ᱮᱢ ᱞᱟᱹᱜᱤᱫ ᱪᱟᱸᱫᱚ ᱯᱤᱪᱷᱤ ᱠᱟᱹᱣᱰᱤ ᱮᱢ ᱦᱩᱭᱩᱜᱼᱟ ᱾ ᱟᱹᱠᱤᱱᱟᱜ ᱠᱩᱠᱢᱩ ᱡᱟᱦᱟᱸ ᱠᱤᱱ ᱧᱮᱞᱮᱫ ᱛᱟᱦᱮ ᱚᱱᱟ ᱯᱩᱨᱟᱹᱣ ᱚᱪᱚᱭ ᱞᱟᱹᱜᱤᱫ ᱠᱤᱱ ᱠᱩᱨᱩᱢᱩᱴᱩ ᱮᱫᱟ ᱟᱜᱟᱢ ᱫᱤᱱ ᱨᱮ ᱜᱤᱫᱽᱨᱟᱹ ᱥᱩᱠᱷ ᱨᱮ ᱛᱟᱦᱮᱸ ᱟᱨ ᱟᱞᱟᱝ ᱦᱚᱸ ᱵᱮᱥᱛᱮ ᱟᱹᱥᱩᱞ ᱫᱚᱦᱚ ᱞᱟᱝᱼᱟ, ᱟᱨ ᱟᱹᱠᱤᱱ ᱫᱚ ᱪᱟᱥᱟᱼᱵᱟᱥᱟ ᱠᱟᱹᱢᱤ ᱮᱠᱟᱞᱟ ᱠᱤᱱ ᱡᱷᱩᱠ ᱠᱚᱣᱟ ᱾
ᱢᱤᱫ ᱫᱤᱱ ᱥᱮᱛᱟᱜ ᱵᱩᱫᱷᱨᱟᱹᱭ ᱟᱡ ᱵᱟᱵᱟ ᱫᱚ ᱵᱟᱥ ᱠᱮᱭᱟᱜ ᱠᱚ ᱡᱚᱢ ᱵᱟᱲᱟ ᱠᱮᱫᱟ ᱟᱨ ᱠᱷᱮᱛ ᱧᱮᱧᱮᱞᱮ ᱪᱟᱞᱟᱣᱮᱱᱟ ᱠᱷᱮᱛ ᱧᱮᱞ ᱠᱷᱚᱱ ᱨᱩᱣᱟᱹᱲ ᱦᱮᱡ ᱠᱟᱛᱮ ᱯᱟᱨᱠᱚᱢ ᱨᱮ ᱜᱤᱛᱤᱡ ᱡᱤᱨᱟᱹᱣ ᱮᱱᱟ ᱟᱨ ᱡᱟᱹᱯᱤᱫ ᱠᱮᱫᱟ ᱵᱮᱞᱟ ᱠᱚᱪᱮᱭᱮᱱ ᱨᱮᱦᱚᱸ ᱵᱟᱭ ᱵᱮᱨᱮᱫ ᱠᱟᱱᱟ ᱠᱷᱟᱱ ᱵᱩᱫᱷᱨᱟᱹᱭ ᱮᱸᱜᱟᱛ ᱫᱚ ᱦᱚᱦᱚ ᱵᱮᱨᱮᱫ ᱞᱟᱹᱜᱤᱫ ᱮ ᱴᱷᱮᱞᱟᱣ ᱠᱮᱫᱮᱭᱟ ᱢᱮᱱᱠᱷᱟᱱ ᱮᱱᱛᱮᱨᱮᱦᱚᱸ ᱵᱟᱭ ᱵᱮᱸᱜᱮᱫ ᱞᱮᱫᱟ ᱵᱷᱟᱞᱟ ᱩᱱᱤᱢᱟ ᱡᱟᱭᱡᱩᱜᱽ ᱞᱟᱹᱜᱤᱫ ᱮ ᱡᱟᱹᱯᱤᱫ ᱩᱛᱟᱹᱨ ᱠᱮᱫᱟ ᱾ ᱵᱩᱫᱷᱨᱟᱹᱭ ᱮᱸᱜᱟᱛᱟᱜ ᱡᱤᱣᱤ ᱫᱚ ᱴᱷᱟᱹᱣᱼᱴᱷᱟᱹᱣ ᱞᱚᱠ ᱠᱟᱱ ᱛᱟᱭᱟ ᱟᱨ ᱱᱚᱛᱮ ᱱᱤᱛ ᱦᱟᱹᱵᱤᱡ ᱛᱮ ᱵᱩᱫᱷᱨᱟᱹᱭ ᱢᱚᱬᱮ ᱪᱟᱱᱟᱪ ᱜᱮ ᱯᱟᱲᱦᱟᱣ ᱟᱠᱟᱫᱟ ᱱᱤᱛ ᱫᱚ ᱚᱲᱟᱜ ᱛᱮ ᱟᱹᱜᱩ ᱠᱮᱫᱮᱭᱟ ᱪᱮᱫᱟᱜ ᱥᱮ ᱵᱩᱫᱷᱨᱟᱹᱭ ᱮᱸᱜᱟᱛᱟᱜ ᱢᱚᱱᱮ ᱡᱤᱣᱤ ᱫᱚ ᱟᱣᱟᱴᱟᱯᱟ ᱪᱟᱵᱟ ᱟᱠᱟᱱᱟ ᱾ ᱵᱩᱫᱷᱨᱟᱹᱭ ᱫᱚ ᱟᱫᱚ ᱟᱛᱳ ᱨᱮᱱ ᱜᱤᱫᱽᱨᱟᱹ ᱥᱟᱞᱟᱜ ᱜᱮ ᱜᱩᱨᱠᱷᱟᱜ ᱥᱟᱯ ᱠᱟᱛᱮ ᱠᱟᱠᱲᱟ ᱜᱚᱡ ᱨᱮ ᱫᱟᱹᱲ ᱵᱟᱲᱟᱭᱟ ᱧᱮᱞ ᱢᱮᱥᱮ ᱢᱤᱫ ᱫᱤᱱᱢᱟ ᱠᱟᱠᱲᱟ ᱜᱚᱡ ᱵᱮᱲᱟ ᱥᱮᱡ ᱠᱚ ᱪᱟᱞᱟᱣᱱᱟ ᱠᱟᱠᱲᱟ ᱛᱩᱧᱼᱛᱩᱧ ᱚᱠᱟᱞᱮᱠᱟ ᱪᱚ ᱫᱷᱤᱨᱤ ᱢᱟ ᱰᱟᱹᱨ ᱨᱮ ᱡᱚᱥ ᱮᱱᱛᱮ ᱪᱚᱸᱲᱮᱪᱚᱱᱟ ᱮᱠᱟᱞ ᱵᱩᱫᱷᱨᱟᱹᱭᱟᱜ ᱢᱮᱫ ᱨᱮᱜᱮ ᱫᱷᱤᱨᱤ ᱪᱟᱞᱟᱣᱮᱱᱟ ᱟᱭᱳ ᱜᱳ ᱼ ᱟᱭᱳ ᱜᱳ ᱠᱟᱛᱮ ᱨᱟᱜ ᱮᱫᱟ ᱢᱮᱫ ᱠᱷᱚᱱᱟᱜ ᱦᱤᱰᱤᱨᱼᱦᱤᱰᱤᱨ ᱢᱟᱭᱟᱢ ᱟᱹᱛᱩᱜ ᱠᱟᱱ ᱛᱟᱭᱟ ᱟᱨ ᱜᱤᱫᱽᱨᱟᱹ ᱢᱟ ᱟᱢ ᱤᱧ ᱠᱚ ᱧᱤᱨ ᱵᱟᱹᱜᱤᱭᱟᱫᱤ ᱵᱩᱫᱷᱨᱟᱹᱭ ᱮᱸᱜᱟᱛ ᱨᱟᱠ ᱟᱸᱡᱚᱢ ᱛᱮ ᱪᱟᱞᱟᱣ ᱮᱱᱟ ᱧᱮᱞ ᱠᱮᱫᱮᱭᱟ ᱢᱮᱫ ᱡᱟᱹᱯᱤᱫ ᱠᱟᱛᱮ ᱨᱟᱨᱟᱜ ᱠᱟᱱ ᱞᱟᱪ ᱥᱮᱡᱛᱮ ᱢᱟᱭᱟᱢ ᱢᱟ ᱟᱹᱛᱩ ᱯᱷᱮᱰᱚᱜ ᱠᱟᱱ ᱦᱟᱠᱚᱯᱟᱠᱚ ᱰᱚᱠᱴᱚᱨ ᱴᱷᱮᱱ ᱤᱫᱤ ᱠᱮᱫᱮᱭᱟ ᱨᱟᱱ ᱵᱟᱲᱟ ᱠᱮᱫᱮᱭᱟᱠᱚ ᱰᱚᱠᱴᱚᱨ ᱫᱚ ᱵᱩᱫᱷᱨᱟᱹᱭ ᱮᱸᱜᱟᱛ ᱮ ᱢᱮᱛᱟᱭ ᱠᱟᱱᱟ ᱡᱚ ᱱᱩᱭ ᱜᱤᱫᱽᱨᱟᱹ ᱫᱚ ᱱᱚᱣᱟ ᱢᱤᱫ ᱢᱮᱫ ᱫᱚ ᱠᱟᱸᱰᱟᱜ ᱛᱟᱭᱟ ᱵᱟᱭ ᱧᱮᱧᱮᱞᱟ ᱮᱱᱛᱮ ᱯᱚᱥᱟᱜ ᱩᱛᱟᱹᱨ ᱟᱠᱟᱱ ᱛᱟᱭᱟ ᱾ ᱟᱫᱚᱢ ᱢᱮᱱᱠᱷᱟᱱ ᱦᱚᱭ ᱧᱮᱧᱮᱞ ᱜᱮᱭᱟ ᱮᱴᱟᱜ ᱢᱮᱫ ᱤᱡ ᱞᱟᱜᱟᱣ ᱟᱭᱟ ᱢᱮᱱᱠᱷᱟᱱ ᱠᱟᱹᱣᱰᱤ ᱫᱚ ᱟᱹᱰᱤ ᱩᱛᱟᱹᱨ ᱞᱟᱜᱟᱣᱟᱜᱼᱟ ᱮᱸᱜᱟᱛ ᱫᱚ ᱟᱹᱰᱤ ᱦᱩᱫᱤᱥ ᱵᱷᱟᱵᱽᱱᱟ ᱨᱮ ᱯᱟᱲᱟᱣ ᱟᱠᱟᱱᱟ ᱜᱤᱫᱽᱨᱟᱹ ᱠᱟᱸᱰᱟᱜ ᱛᱟᱭ ᱦᱚᱸ ᱫᱩᱠ ᱜᱮᱭ ᱟᱹᱭᱠᱟᱹᱣᱫᱟ ᱚᱱᱟ ᱛᱮ ᱰᱚᱠᱴᱚᱨ ᱮ ᱢᱮᱛᱟᱫᱮᱭᱟ ᱢᱟ ᱤᱧᱟᱜ ᱢᱮᱫ ᱜᱮ ᱜᱤᱫᱽᱨᱟᱹ ᱨᱮ ᱩᱪᱟᱹᱲ ᱢᱮ ᱤᱧ ᱫᱚ ᱢᱤᱫ ᱢᱮᱫ ᱠᱟᱹᱲᱤᱜ ᱛᱤᱧ ᱨᱮᱦᱚᱸ ᱵᱮᱥ ᱜᱮᱭᱟ ᱾ ᱢᱚᱱᱮᱼᱢᱚᱱᱮ ᱛᱮ ᱦᱩᱫᱤᱥᱚᱜ ᱠᱟᱱᱟ ᱤᱧ ᱮᱥᱠᱟᱨ ᱜᱮᱭᱟᱹᱧ ᱟᱪ ᱵᱟᱵᱟ ᱦᱚᱸ ᱢᱟᱸᱜᱟᱲ ᱜᱩᱯᱤ ᱪᱟᱞᱟᱣᱱᱟ ᱜᱤᱫᱽᱨᱟᱹ ᱢᱮᱱᱟᱭ ᱛᱤᱧ ᱠᱷᱚᱱ ᱤᱧ ᱦᱚᱸ ᱢᱤᱱᱟᱹᱧ ᱜᱮᱭᱟ; ᱛᱟᱭᱚᱢ ᱛᱮᱫᱚ ᱜᱤᱫᱽᱨᱟᱹᱣᱟᱜ ᱢᱮᱫ ᱱᱟᱯᱟᱭ ᱮᱱᱛᱟᱭᱟ ᱟᱨ ᱟᱪ ᱮᱸᱜᱟᱛ ᱫᱚ ᱢᱤᱫ ᱢᱮᱫ ᱛᱮᱜᱮ ᱧᱮᱧᱮᱞᱟ ᱾ ᱢᱤᱫ ᱢᱮᱫ ᱮ ᱠᱟᱹᱲᱤ ᱭᱮᱱ ᱨᱮᱦᱚᱸ ᱵᱟᱹᱵᱩ ᱟᱨᱦᱚᱸ ᱟᱥᱲᱟ ᱤᱫᱤ ᱚᱴᱚ ᱠᱟᱹᱫᱮᱭᱟ ᱮᱸᱜᱟᱛ ᱪᱟᱸᱫᱚ ᱨᱮ ᱢᱤᱫ ᱫᱷᱟᱣ ᱦᱤᱨᱤ ᱪᱟᱞᱟᱜᱼᱟ ᱟᱫᱚ ᱵᱩᱫᱷᱨᱟᱹᱭ ᱮᱸᱜᱟᱛ ᱢᱮᱛᱟᱭ ᱠᱟᱱᱟ ᱮᱜᱳ ᱦᱤᱨᱤ ᱫᱚ ᱟᱞᱚᱢ ᱦᱤᱡᱩᱜᱼᱟ ᱵᱟᱠᱷᱟᱡ ᱤᱧ ᱩᱭᱦᱟᱹᱨ ᱢᱮᱭᱟ ᱚᱲᱟᱜ ᱛᱮᱜᱮ ᱥᱮᱱᱚᱜ ᱥᱟᱹᱱᱟᱹᱧᱟ ᱚᱱᱟ ᱤᱭᱟᱹᱛᱮ ᱮᱸᱜᱟᱛ ᱫᱚ ᱜᱤᱫᱽᱨᱟᱹ ᱦᱤᱨᱤ ᱦᱚᱸ ᱟᱫᱚ ᱵᱟᱭ ᱪᱟᱞᱟᱜᱼᱟ ᱜᱤᱫᱽᱨᱟᱹᱣᱟᱜ ᱥᱩᱠᱷ ᱫᱩᱠᱷ ᱵᱟᱰᱟᱭ ᱞᱟᱹᱜᱤᱫ ᱛᱮ ᱦᱚᱲᱮ ᱠᱳᱞ ᱠᱟᱠᱳᱣᱟ ᱟᱨᱮ ᱢᱮᱱᱟ ᱵᱩᱫᱷᱨᱟᱹᱭ ᱫᱚ ᱞᱟᱹᱭᱟᱭ ᱢᱮ ᱟᱢ ᱜᱳᱜᱳ ᱫᱚ ᱱᱟᱯᱟᱭ ᱜᱮ ᱢᱮᱱᱟᱭᱟ ᱟᱢ ᱫᱚ ᱢᱚᱱᱮ ᱞᱟᱜᱟᱣ ᱠᱟᱛᱮ ᱯᱟᱲᱦᱟᱜ ᱢᱮ ᱾ ᱮᱱᱠᱟᱼᱮᱱᱠᱟ ᱛᱮᱜᱮ ᱟᱭᱢᱟ ᱥᱮᱨᱢᱟ ᱯᱟᱨᱚᱢ ᱤᱫᱤᱜ ᱠᱟᱱᱟ ᱵᱩᱫᱷᱨᱟᱹᱭ ᱫᱚ ᱢᱤᱫ ᱫᱷᱟᱣ ᱦᱚᱸ ᱚᱲᱟᱜ ᱫᱚ ᱵᱟᱭ ᱦᱮᱡ ᱞᱮᱜᱟ ᱞᱮᱱᱟ ᱥᱚᱦᱚᱨᱵᱟᱡᱟᱨ ᱨᱮᱜᱮ ᱛᱟᱦᱮᱸ ᱦᱮᱣᱟᱭᱮᱱᱟ ᱟᱡ ᱜᱳᱜᱳᱣᱟᱜ ᱢᱮᱫ ᱢᱩᱴᱷᱟᱹᱱ ᱠᱚ ᱦᱤᱲᱤᱧ ᱪᱟᱵᱟ ᱠᱮᱫᱟ ᱟᱛᱳ ᱚᱲᱟᱜ ᱮᱸᱜᱟᱛ ᱢᱟᱭᱟ ᱠᱚᱫᱚ ᱪᱟᱵᱟ ᱩᱛᱟᱹᱨ ᱮᱱᱛᱟᱭᱟ ᱮᱱᱛᱮ ᱪᱟᱹᱠᱨᱤ ᱧᱟᱢ ᱠᱮᱫᱼᱟ ᱵᱮᱝᱠ ᱢᱮᱱᱟᱡᱟᱨ ᱵᱟᱡᱟᱨ ᱨᱮᱜᱮ ᱚᱲᱟᱜ ᱫᱩᱶᱟᱹᱨ ᱠᱮᱫᱟ ᱵᱟᱹᱦᱩ ᱦᱚᱸᱭ ᱧᱟᱢᱟᱱᱟ ᱮᱸᱜᱟᱛ ᱫᱚ ᱱᱟᱥᱤ ᱦᱚᱸ ᱵᱟᱝ ᱜᱮᱭ ᱫᱤᱥᱟᱹ ᱞᱮᱫᱮᱭᱟ ᱾
ᱱᱤᱛ ᱫᱚ ᱵᱩᱫᱷᱨᱟᱹᱭ ᱮᱸᱜᱟᱛ ᱦᱚᱲᱢᱚ ᱫᱟᱲᱮ ᱠᱚ ᱠᱚᱢ ᱪᱟᱞᱟᱜ ᱠᱟᱱ ᱛᱟᱭᱟ ᱯᱮᱭᱟ ᱡᱟᱸᱜᱟ ᱛᱮ ᱛᱟᱲᱟᱢ ᱮᱫᱟ ᱡᱚᱛᱚᱱ ᱟᱹᱥᱩᱞ ᱩᱪᱩᱜ ᱞᱟᱹᱜᱤᱫ ᱛᱮ ᱵᱟᱡᱟᱨ ᱨᱮ ᱢᱮᱱᱟᱭ ᱟᱡ ᱨᱮᱱ ᱦᱚᱯᱚᱱ ᱴᱷᱮᱱ ᱪᱟᱞᱟᱜ ᱮ ᱢᱚᱱᱮ ᱠᱮᱫᱟ ᱾ ᱛᱤᱱᱟᱹᱜ ᱜᱟᱱ ᱪᱚ ᱯᱟᱸᱪᱤ ᱟᱝᱪᱟᱨ ᱨᱮ ᱠᱟᱹᱣᱰᱤ ᱴᱷᱮᱸᱴ ᱠᱮᱫᱟ ᱟᱨ ᱥᱚᱦᱚᱨ ᱵᱟᱡᱟᱨ ᱛᱮ ᱢᱚᱦᱰᱟ ᱭᱮᱱᱟ ᱾ ᱵᱟᱡᱟᱨ ᱨᱮ ᱛᱤᱭᱩᱜ ᱠᱮᱫ ᱠᱷᱟᱱ ᱦᱟᱹᱱᱤᱼᱱᱷᱟᱹᱭ ᱠᱩᱞᱤ ᱵᱟᱲᱟᱭᱮᱫ ᱠᱚᱣᱟ ᱠᱩᱞᱤᱼᱠᱩᱞᱤ ᱛᱮ ᱵᱩᱫᱷᱨᱟᱹᱭᱟᱜ ᱚᱲᱟᱜ ᱮ ᱠᱩᱞᱤ ᱧᱟᱢ ᱠᱮᱫᱟ ᱫᱩᱶᱟᱹᱨ ᱨᱮ ᱢᱤᱫ ᱫᱟᱨᱣᱟᱱ ᱢᱮᱱᱟᱭᱟ ᱩᱱᱤ ᱜᱮ ᱠᱩᱞᱤ ᱠᱮᱫᱮᱭᱟ ᱵᱩᱫᱷᱨᱟᱹᱭᱟᱜ ᱚᱲᱟᱜ ᱫᱚ ᱵᱟᱹᱵᱩ ᱚᱠᱟ ᱥᱮᱡ ᱨᱮ, ᱟᱫᱚᱭ ᱢᱮᱛᱟᱭ ᱠᱟᱱᱟ ᱱᱚᱣᱟ ᱠᱟᱱ ᱜᱮᱭᱟ ᱾ ᱮᱸᱜᱟᱛ ᱮ ᱢᱮᱱᱫᱟ ᱵᱟᱹᱵᱩ ᱵᱩᱫᱷᱨᱟᱹᱭ ᱴᱷᱮᱱᱤᱧ ᱦᱮᱡ ᱟᱠᱟᱱ ᱢᱮᱱᱟᱭᱟ ᱥᱮ ᱵᱟᱝ ᱫᱟᱨᱣᱟᱱ ᱮ ᱨᱚᱲ ᱠᱮᱫᱟ ᱢᱮᱱᱟᱭ ᱜᱮᱭᱟ ᱦᱟᱯᱮ ᱛᱚᱵᱮᱧ ᱞᱟᱹᱭ ᱚᱴᱚᱣᱟᱭ ᱞᱮᱜᱮ ᱱᱚᱝᱰᱮ ᱜᱮᱢ ᱫᱩᱲᱩᱵ ᱦᱟᱛᱟᱲᱚᱜᱼᱟ ᱾ ᱫᱟᱨᱣᱟᱱ ᱫᱚ ᱵᱩᱫᱷᱨᱟᱹᱭ ᱮ ᱞᱟᱹᱭᱟᱭ ᱠᱟᱱᱟ ᱮ ᱠᱤᱥᱟᱹᱬ ᱢᱤᱫ ᱠᱟᱹᱬᱤ ᱵᱩᱲᱷᱤ ᱦᱮᱡ ᱠᱟᱱᱟ ᱟᱢ ᱥᱟᱞᱟᱜ ᱮ ᱧᱟᱯᱟᱢᱚᱜ ᱞᱟᱜᱤᱫ ᱵᱩᱫᱷᱨᱟᱹᱭ ᱮ ᱢᱮᱱᱫᱟ ᱠᱟᱹᱬᱤ ᱵᱩᱰᱷᱤ ᱥᱟᱶ ᱧᱟᱯᱟᱢ ᱠᱟᱛᱮ ᱪᱮᱫ ᱤᱧ ᱧᱟᱢᱟ; ᱢᱮᱛᱟᱭ ᱾ ᱢᱮ ᱵᱟᱭ ᱵᱚᱞᱚᱣᱟ, ᱫᱟᱭᱟ ᱜᱮ ᱵᱮᱪᱟᱨᱟ ᱦᱚᱯᱚᱱ ᱚᱲᱟᱜ ᱧᱟᱢ ᱠᱟᱛᱮ ᱨᱮᱦᱚᱸ ᱵᱟᱭ ᱵᱚᱞᱚ ᱫᱟᱲᱮᱭᱟᱫᱟ ᱦᱚᱲᱢᱚ ᱡᱤᱣᱤ ᱡᱚᱛᱚ ᱟᱥᱟ ᱠᱟᱛᱮ ᱮ ᱤᱫᱤ ᱞᱮᱫ ᱛᱟᱭᱟ ᱟᱹᱥᱩᱞ ᱩᱪᱩᱜᱼᱟ ᱢᱮᱱᱛᱮ ᱾ ᱛᱟᱲᱟᱢᱛᱟᱲᱟᱢ ᱛᱮ ᱞᱟᱸᱜᱟ ᱪᱟᱵᱟ ᱭᱮᱱᱟ ᱫᱟᱠᱟ ᱨᱮᱸᱜᱮᱡ ᱫᱟᱜ ᱛᱮᱛᱟᱝ ᱛᱮ ᱞᱚᱨᱟᱣ ᱩᱛᱟᱹᱨ ᱮᱱᱟ ᱵᱩᱨᱥᱤ ᱥᱮᱸᱜᱮᱞ ᱞᱮᱠᱟ ᱡᱤᱣᱤ ᱢᱚᱰᱚᱠᱼᱢᱚᱰᱚᱠ ᱞᱚᱜ ᱠᱟᱱ ᱛᱟᱭᱟ ᱥᱚᱲᱚᱠ ᱟᱲᱮ ᱢᱤᱫ ᱴᱮᱱ ᱫᱟᱨᱮ ᱵᱩᱴᱟᱹ ᱨᱮ ᱫᱩᱲᱩᱵ ᱡᱤᱨᱟᱹᱣ ᱮᱱᱟ ᱢᱤᱫ ᱜᱷᱟᱹᱲᱤ ᱛᱟᱭᱚᱢ ᱠᱷᱟᱱ ᱜᱮ ᱢᱤᱫ ᱛᱤᱨᱞᱟᱹ ᱦᱚᱯᱚᱱ ᱰᱩᱞᱩᱝ ᱜᱟᱹᱰᱤ ᱛᱮ ᱟᱥᱲᱟ ᱠᱷᱚᱱ ᱨᱩᱣᱟᱹᱲ ᱠᱟᱱ ᱛᱟᱦᱮᱸᱜᱼᱟ ᱵᱩᱫᱷᱨᱟᱹᱭ ᱮᱸᱜᱟᱛ ᱫᱚ ᱩᱱᱤ ᱯᱟᱹᱴᱷᱩᱣᱟᱹ ᱠᱩᱲᱤ ᱦᱚᱦᱚ ᱛᱮᱸᱜᱚ ᱠᱮᱫᱮᱭᱟ ᱟᱨ ᱢᱮᱛᱟᱭ ᱠᱟᱱᱟ ᱵᱤᱴᱤ ᱠᱟᱜᱚᱡᱽ ᱟᱨ ᱱᱚᱱᱚᱞ ᱚᱰᱚᱠ ᱛᱟᱢ ᱥᱮ ᱡᱟᱦᱟᱸ ᱠᱟᱛᱷᱟ ᱤᱧ ᱴᱚᱲᱟ ᱚᱱᱟ ᱟᱢ ᱚᱞ ᱢᱮ ᱩᱱᱤ ᱫᱚ ᱵᱩᱫᱷᱨᱟᱹᱭ ᱠᱟᱹᱴᱤᱡ ᱮ ᱛᱟᱦᱮᱸ ᱠᱟᱱ ᱚᱠᱛᱚ ᱨᱮᱭᱟᱜ ᱥᱟᱱᱟᱢ ᱜᱷᱟᱴᱱᱟᱭ ᱚᱞ ᱚᱪᱚ ᱠᱮᱫᱮᱭᱟ ᱟᱨ ᱢᱮᱛᱟᱭ ᱠᱟᱱᱟ ᱵᱤᱴᱤ ᱵᱩᱫᱷᱨᱟᱹᱭ ᱚᱲᱟᱜ ᱮᱢ ᱧᱮᱞ ᱟᱠᱟᱫ ᱜᱮᱭᱟ ᱾ ᱯᱟᱹᱴᱷᱩᱣᱟᱹ ᱠᱩᱲᱤ ᱢᱮᱱᱫᱟ ᱦᱚᱸ ᱧᱮᱞ ᱟᱠᱟᱫ ᱜᱮᱭᱟ ᱵᱩᱰᱷᱤ ᱮᱸᱜᱟᱛ ᱚᱸᱰᱮ ᱜᱮ ᱤᱫᱤ ᱚᱴᱚᱠᱟᱢ, ᱤᱧ ᱫᱚ ᱢᱟᱹᱭ ᱵᱩᱫᱷᱨᱟᱹᱭ ᱮᱸᱜᱟᱛ ᱠᱟᱱ ᱜᱮᱭᱟᱧ ᱩᱱᱤ ᱯᱟᱹᱴᱷᱩᱣᱟᱹ ᱠᱩᱲᱤ ᱫᱚ ᱵᱮᱪᱟᱨᱟ ᱩᱱᱤ ᱵᱩᱰᱷᱤᱭᱟᱜ ᱡᱚᱛᱚ ᱠᱟᱹᱢᱤ ᱟᱸᱡᱚᱢ ᱠᱮᱫ ᱛᱟᱭᱟ ᱟᱨ ᱪᱟᱞᱟᱣᱱᱟ ᱾ ᱮᱸᱜᱟᱛ ᱫᱚ ᱢᱚᱱᱮ ᱡᱤᱣᱤ ᱟᱥᱠᱮᱛ ᱪᱟᱵᱟᱭᱮᱱ ᱛᱟᱭᱟ ᱫᱟᱨᱮ ᱵᱩᱴᱟᱹ ᱨᱮ ᱜᱤᱛᱤᱡ ᱡᱟᱹᱯᱤᱫ ᱠᱮᱫᱟ ᱟᱨ ᱚᱱᱟ ᱡᱟᱹᱯᱤᱫ ᱨᱮᱜᱮ ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱠᱷᱚᱱ ᱫᱚ ᱥᱟᱦᱟ ᱩᱛᱟᱹᱨ ᱮᱱᱟ, ᱵᱩᱫᱷᱨᱟᱹᱭ ᱫᱚ ᱚᱱᱟ ᱠᱟᱜᱚᱡᱽ ᱧᱟᱢ ᱠᱮᱫ ᱥᱟᱶ ᱛᱮ ᱯᱟᱲᱦᱟᱣ ᱮ ᱫᱷᱩᱨᱟᱹᱣ ᱮᱱᱟ ᱴᱩᱣᱟᱹᱨ ᱜᱮᱭᱟᱭ ᱟᱨ ᱟᱭᱟᱜ ᱢᱤᱫ ᱢᱮᱫ ᱨᱮᱫᱚ ᱟᱡ ᱜᱚᱜᱚᱣᱟᱜ ᱢᱮᱫ ᱠᱟᱱᱟ ᱚᱱᱟ ᱠᱟᱛᱷᱟ ᱫᱤᱥᱟᱹ ᱩᱭᱦᱟᱹᱨ ᱠᱮᱫ ᱠᱷᱟᱱ ᱟᱹᱰᱤ ᱵᱷᱟᱵᱽᱱᱟ ᱦᱮᱡ ᱟᱫᱮᱭᱟ ᱟᱨ ᱥᱚᱲᱚᱠ ᱥᱮᱱ ᱧᱤᱨ ᱚᱰᱚᱠ ᱮᱱᱟ ᱠᱚᱭᱚᱜ ᱠᱮᱫᱟᱭ ᱫᱟᱨᱮ ᱵᱩᱴᱟᱹ ᱨᱮ ᱜᱤᱛᱤᱡ ᱟᱠᱟᱱ ᱟᱡ ᱜᱚᱜᱚ ᱧᱮᱞᱧᱟᱢ ᱠᱮᱫᱮᱭᱟ ᱧᱤᱨ ᱪᱟᱞᱟᱣᱮᱱᱟᱭ ᱟᱨ ᱨᱟᱜ ᱚᱛ ᱦᱚᱦᱚᱣᱟᱭ ᱠᱟᱱᱟ ᱮᱜᱳ ᱤᱠᱟᱹ ᱠᱟᱹᱧ ᱢᱮ ᱟᱫᱚ ᱢᱟᱨᱟᱝ ᱤᱧ ᱵᱷᱩᱞ ᱟᱠᱟᱫᱟ ᱵᱟᱹᱧ ᱦᱩᱫᱤᱥ ᱞᱮᱫᱟ ᱤᱧ ᱜᱚᱜᱚ ᱠᱟᱱ ᱜᱮᱭᱟᱢ ᱾ ᱵᱩᱫᱷᱨᱟᱹᱭ ᱫᱚ ᱟᱡ ᱜᱚᱜᱚ ᱦᱟᱹᱰᱩᱵ ᱠᱟᱛᱮ ᱟᱡ ᱜᱚᱜᱚᱣᱟᱜ ᱠᱩᱰᱟᱹᱢ ᱨᱮ ᱵᱚᱦᱚᱜ ᱡᱟᱞᱟᱛ ᱠᱟᱛᱮ ᱧᱩᱢ ᱦᱟᱞᱟᱝ ᱮ ᱨᱟᱜ ᱡᱚᱝ ᱟᱹᱰᱤ ᱟᱭᱢᱟ ᱚᱠᱛᱚ ᱯᱟᱨᱚᱢ ᱮᱱᱟ ᱦᱚᱢᱚᱨ ᱦᱟᱞᱟᱝ ᱠᱟᱛᱮ ᱦᱚᱸ ᱵᱷᱟᱞᱟ ᱪᱮᱫ ᱮ ᱪᱮᱠᱟ ᱫᱟᱲᱮᱭᱟᱜᱼᱟ ᱾
