ᱡᱟᱱᱟᱢ ᱟᱲᱟᱝ ᱺ ᱥᱟᱱᱛᱟᱲᱤ (ᱥᱟᱯᱲᱮᱫ ᱟᱠᱷᱲᱟ)

ᱱᱟᱦᱟᱜ ᱡᱩᱜᱽ ᱫᱚ ᱦᱩᱭᱩᱜ ᱠᱟᱱᱟ ᱥᱟᱬᱮᱥ ᱡᱩᱜᱽ ᱾ ᱚᱱᱟ ᱥᱟᱬᱮᱥ ᱛᱟᱨᱟᱥ ᱛᱮ ᱱᱤᱛ ᱫᱚ ᱰᱤᱡᱤᱴᱟᱞ ᱡᱩᱜᱽ ᱾ ᱮᱹᱟᱤᱹ (A.I) ᱡᱩᱜᱽ ᱾ ᱢᱮᱱᱫᱚ ᱥᱟᱬᱮᱥ ᱨᱮᱭᱟᱜ ᱯᱩᱞᱥᱩ ᱢᱟᱨᱥᱟᱞ ᱛᱮ ᱥᱟᱱᱟᱢ ᱠᱚ ᱜᱚᱭᱚᱱᱚᱜ ᱯᱟᱸᱡᱟ ᱠᱟᱜ ᱨᱮᱭᱟᱜ ᱦᱚᱨ ᱰᱟᱦᱟᱨ ᱨᱮ ᱢᱮᱱᱟᱜ ᱵᱚᱱᱟ ᱾ ᱪᱮᱫᱟᱜ ᱪᱮ, ᱚᱠᱛᱚ ᱨᱮᱭᱟᱜ ᱞᱟᱲᱟᱣᱱᱟ ᱫᱟᱲᱮ ᱜᱮ ᱚᱱᱠᱟᱱᱟ ᱾ ᱚᱱᱟ ᱫᱚ ᱢᱤᱫ ᱜᱮᱭᱟᱱ ᱦᱮᱞᱟᱣ ᱠᱟᱹᱢᱤ ᱠᱟᱱᱟ ᱾ ᱚᱱᱟ ᱜᱮᱭᱟᱱ ᱫᱟᱲᱮ ᱛᱮ ᱚᱱᱟ ᱵᱮᱵᱷᱟᱨ ᱨᱮᱭᱟᱜ ᱫᱤᱥᱟᱹ ᱦᱤᱡᱩᱜᱼᱟ ᱾ ᱮᱱᱠᱷᱟᱱ ᱜᱮᱭᱟᱱ ᱦᱚᱲ ᱠᱚ ᱞᱮᱠᱟ ᱥᱟᱶᱛᱟ ᱛᱟᱞᱟᱨᱮᱢ ᱛᱟᱦᱮᱸ ᱠᱮᱭᱟ ᱾ ᱟᱢᱦᱚᱸ ᱢᱤᱫ ᱜᱷᱟᱹᱲᱤ ᱡᱤᱣᱚᱱ ᱠᱷᱟᱸᱰᱟᱣ ᱠᱩᱥᱤ ᱨᱟᱹᱥᱠᱟᱹᱢ ᱧᱟᱢᱟ ᱟᱨ ᱢᱟᱹᱱ ᱛᱟᱢ ᱦᱚᱸ ᱢᱟᱱᱟᱣ ᱵᱟᱛᱟᱣ ᱜᱟᱱᱚᱜᱼᱟ ᱾ ᱚᱱᱟᱛᱮ, ᱚᱱᱟ ᱜᱮᱭᱟᱱ ᱟᱨᱡᱟᱣ ᱞᱟᱹᱜᱤᱫ ᱚᱞ ᱯᱟᱲᱦᱟᱣ ᱥᱮ ᱥᱮᱪᱮᱫᱚᱜ ᱫᱚ ᱟᱹᱰᱤ ᱛᱮᱫ ᱜᱮ ᱞᱟᱹᱠᱛᱤ ᱢᱮᱱᱟᱜ ᱟᱱᱟ ᱾ ᱮᱱᱠᱷᱟᱱ, ᱚᱱᱟ ᱥᱮᱪᱮᱫ ᱫᱚ ᱪᱮᱫ ᱠᱟᱱᱟ? ᱥᱮᱪᱮᱫ ᱫᱚ ᱚᱱᱟ ᱠᱟᱱᱟ, ᱡᱟᱦᱟᱸ ᱫᱚ ᱵᱤᱪᱟᱹᱨ ᱫᱟᱲᱮ ᱟᱨ ᱵᱟᱰᱟᱭ ᱫᱟᱲᱮ ᱦᱟᱨᱟ ᱨᱮᱱᱟᱜ ᱨᱟᱱ ᱠᱟᱱᱟ ᱾ ᱡᱟᱦᱟᱸᱭ ᱡᱟᱦᱟᱸ ᱞᱮᱠᱟ ᱥᱮᱪᱮᱫ ᱠᱚᱭ ᱟᱯᱱᱟᱨ ᱠᱟᱜᱼᱟ, ᱩᱱᱤ ᱚᱱᱠᱟᱱ ᱠᱟᱛᱷᱟ ᱪᱮ ᱥᱟᱛᱟᱢ ᱪᱮᱛᱟᱱ ᱨᱮ ᱵᱟᱰᱟᱭ ᱫᱟᱲᱮ ᱦᱤᱡᱩᱜ ᱛᱟᱭᱟ ᱾ ᱟᱨᱦᱚᱸ ᱥᱮᱪᱮᱫ ᱫᱚ, ᱢᱤᱫ ᱥᱟᱶᱟᱨ ᱜᱮᱭᱟᱱ ᱠᱟᱱᱟ, ᱡᱟᱦᱟᱸ ᱫᱚ ᱞᱟᱹᱭ ᱪᱟᱞ, ᱧᱮᱞ ᱪᱮᱫ, ᱵᱟᱰᱟᱭ ᱧᱟᱢ, ᱛᱚᱨᱟᱣ ᱜᱟᱱ, ᱯᱟᱸᱡᱟ ᱪᱮᱫ ᱥᱟᱶᱛᱮ ᱦᱮᱞᱟᱣ ᱯᱟᱨᱚᱢ ᱜᱟᱱ ᱨᱮᱭᱟᱜ ᱵᱤᱨᱫᱟᱹᱛ ᱠᱟᱱᱟ ᱾ ᱡᱟᱦᱟᱸ ᱫᱚ ᱱᱤᱛᱚᱝ ᱡᱩᱜᱽ ᱨᱮ ᱚᱞ ᱤᱛᱩᱱ ᱟᱥᱲᱟ ᱠᱚᱨᱮ ᱯᱩᱭᱞᱩ ᱫᱚ ᱧᱟᱢᱚᱜᱼᱟ ᱾ ᱢᱮᱱᱫᱚ ᱟᱥᱲᱟ ᱜᱮ ᱢᱮᱱᱢᱟ ᱯᱩᱭᱞᱩ ᱜᱮᱭᱟᱱ ᱰᱟᱦᱟᱨ ᱛᱮ ᱛᱟᱲᱟᱢ ᱨᱮᱭᱟᱜ ᱴᱷᱤᱠᱟᱹᱱᱟᱹ ᱠᱟᱱᱟ ᱾ ᱡᱟᱦᱟᱸᱭ ᱱᱚᱶᱟ ᱟᱥᱲᱟ ᱛᱮ ᱜᱤᱫᱟᱹᱨ ᱵᱟᱹᱥ ᱠᱷᱚᱱᱟᱜ ᱵᱟᱭ ᱪᱟᱞᱟᱣ ᱟᱠᱟᱱᱟ, ᱩᱱᱤ ᱫᱚ ᱢᱩᱨᱩᱠ ᱢᱮᱱᱛᱮ ᱫᱩᱥᱟᱹᱣ ᱦᱚᱸ ᱵᱟᱝ ᱠᱟᱱᱟ ᱾ ᱥᱤᱨᱡᱚᱱ ᱨᱮᱭᱟᱜ ᱢᱟᱭᱟ ᱜᱮ ᱚᱱᱠᱟᱱᱟ ᱡᱟᱦᱟᱸᱭ ᱵᱟᱭ ᱚᱞ ᱯᱟᱲᱦᱟᱣ ᱟᱠᱟᱱᱤᱡᱽ ᱦᱚᱸ ᱜᱮᱭᱟᱱ ᱥᱮᱭᱟᱱ ᱦᱚᱲ ᱦᱚᱸᱭ ᱦᱩᱭ ᱠᱮᱭᱟ ᱾ ᱤᱠᱷᱟᱹᱱ ᱚᱱᱟ ᱫᱚ ᱵᱤᱪᱟᱹᱨ ᱪᱮ ᱵᱤᱨᱫᱟᱹᱛ ᱛᱮᱜᱮ ᱾ ᱵᱟᱰᱟᱣ ᱧᱟᱢ ᱟᱠᱟᱱᱟ ᱪᱤ, ᱚᱞ ᱯᱟᱲᱦᱟᱣ ᱠᱟᱛᱮ ᱟᱹᱠᱤᱞ ᱧᱟᱢ ᱠᱟᱜ ᱦᱚᱲ ᱟᱨ ᱵᱟᱝ ᱚᱞ ᱯᱟᱲᱦᱟᱣ ᱠᱟᱛᱮ ᱟᱹᱠᱤᱞ ᱧᱟᱢ ᱟᱠᱟᱫ ᱦᱚᱲ ᱫᱚ ᱵᱟᱝ ᱠᱤᱱ ᱵᱟᱨᱟᱵᱟᱹᱨᱤ ᱠᱮᱭᱟ ᱾ ᱩᱱᱠᱤᱱ ᱠᱤᱱ ᱢᱩᱫᱽ ᱨᱮ ᱚᱞ ᱯᱟᱲᱦᱟᱣ ᱦᱚᱲᱟᱜ ᱜᱮᱭᱟᱱ ᱜᱮ ᱞᱚᱭᱚᱝ ᱨᱮ ᱞᱮᱠᱷᱟ ᱠᱚᱜᱼᱟ ᱾ ᱚᱱᱟ ᱛᱮ ᱥᱟᱱᱟᱢ ᱠᱚᱜᱮ ᱚᱞ ᱯᱟᱲᱦᱟᱣ ᱠᱟᱛᱮ ᱜᱮᱭᱟᱱ ᱟᱨᱡᱟᱣ ᱨᱮᱭᱟᱜ ᱦᱚᱨ ᱰᱟᱦᱟᱨ ᱯᱟᱸᱡᱟ ᱨᱮ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱫᱚ ᱛᱷᱚᱠ ᱠᱮ ᱛᱷᱚᱠ ᱦᱟᱹᱴᱤᱧ ᱨᱮ ᱢᱮᱱᱟᱜ ᱟᱠᱟᱫᱟ ᱾ ᱡᱮᱢᱚᱱ ᱞᱟᱱᱟᱛᱟᱨ ᱟᱥᱲᱟ ᱠᱷᱚᱱ ᱩᱱᱩᱥᱩᱞ ᱟᱥᱲᱟ ᱾ ᱛᱟᱭᱚᱢ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱟᱨᱵᱟᱝ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱮᱢᱟᱱ ᱾ ᱤᱠᱷᱟᱹᱱ ᱚᱠᱟ ᱜᱮᱭᱟᱱ ᱥᱮ ᱚᱠᱟ ᱵᱤᱨᱫᱟᱹ ᱧᱟᱢ ᱠᱟᱛᱮ ᱟᱹᱥᱩᱞᱚᱜ ᱨᱮᱭᱟᱜ ᱰᱟᱦᱟᱨ ᱜᱚᱴᱟ ᱜᱟᱱ ᱠᱮᱭᱟ, ᱚᱱᱟᱦᱚᱸ ᱡᱩᱫᱟᱹ ᱡᱩᱫᱟᱹ ᱢᱮᱱᱟᱜ ᱟᱱᱟ ᱾ ᱡᱮᱢᱚᱱ ᱳᱠᱤᱞ, ᱤᱸᱡᱤᱱᱤᱭᱟᱨ ᱪᱮ ᱰᱟᱠᱛᱚᱨ ᱮᱢᱟᱱ ᱠᱚ ᱾ ᱚᱱᱟ ᱠᱚᱦᱚᱸ ᱟᱨᱦᱚᱸ ᱟᱹᱰᱤ ᱞᱮᱠᱟ ᱛᱮ ᱦᱟᱹᱴᱤᱧ ᱟᱠᱟᱱᱟ ᱾ ᱢᱮᱱᱫᱚ ᱳᱠᱤᱞ ᱦᱚᱸ ᱟᱹᱰᱤ ᱞᱮᱠᱟᱱ ᱳᱠᱤᱞ, ᱤᱸᱡᱤᱱᱤᱭᱟᱨ ᱦᱚᱸ ᱟᱹᱰᱤ ᱞᱮᱠᱟᱱ ᱤᱸᱡᱤᱱᱤᱭᱟᱨ ᱟᱨ ᱰᱟᱠᱛᱚᱨ ᱦᱚᱸ ᱟᱹᱰᱤ ᱞᱮᱠᱟᱱ ᱰᱟᱠᱛᱚᱨ ᱠᱚ ᱢᱮᱱᱟᱜ ᱠᱚᱣᱟ ᱾ ᱟᱵᱚ ᱟᱹᱫᱤᱢ ᱠᱚ, ᱦᱳᱲ ᱠᱚ, ᱛᱮᱦᱮᱸᱧ ᱱᱚᱝᱠᱟᱱ ᱟᱱᱟᱴ ᱨᱮ ᱢᱮᱱᱟᱜ ᱵᱚᱱᱟ ᱡᱟᱦᱟᱸ ᱫᱤᱥᱟᱹ ᱜᱟᱱ ᱨᱮᱭᱟᱜ ᱫᱷᱟᱹᱲ ᱥᱩᱛᱩᱨ ᱜᱮ ᱵᱟᱝ ᱧᱟᱢᱚᱜ ᱟᱱᱟ ᱾ ᱤᱠᱷᱟᱹᱱ ᱱᱤᱱᱟᱹᱜ ᱵᱟᱰᱟᱭ ᱧᱟᱢᱚᱜ ᱠᱟᱱᱟ, ᱯᱟᱞᱮ ᱟᱵᱚ ᱨᱤᱱ ᱟᱹᱜᱤᱞ ᱦᱟᱯᱟᱲᱟᱢ ᱠᱚ ᱚᱞ ᱯᱟᱲᱦᱟᱣ ᱛᱮ ᱠᱚ ᱛᱟᱭᱚᱢ ᱞᱮᱱᱟ ᱾ ᱚᱱᱟᱛᱮ ᱱᱚᱶᱟ ᱦᱟᱬᱟᱜ ᱱᱤᱛ ᱟᱵᱚ ᱠᱚᱴᱷᱮᱱ ᱧᱮᱞ ᱧᱟᱢᱚᱜ ᱠᱟᱱᱟ ᱾ ᱱᱚᱸᱰᱮ ᱞᱟᱹᱭ ᱥᱚᱫᱚᱨ ᱜᱮ ᱵᱩᱜᱤᱭᱟ, ᱛᱮᱦᱮᱸᱧ ᱟᱵᱚ ᱥᱟᱱᱟᱢ ᱠᱚᱵᱚᱱ ᱚᱞ ᱯᱟᱲᱦᱟᱣ ᱟᱠᱟᱱ ᱨᱮᱦᱚᱸ ᱚᱱᱟ ᱚᱞ ᱯᱟᱲᱦᱟᱣ ᱫᱚ ᱟᱵᱚᱣᱟᱜ ᱛᱮ ᱚᱞ ᱯᱟᱲᱦᱟᱣ ᱫᱟᱲᱮ ᱫᱚ ᱵᱟᱝ ᱠᱟᱱᱟ ᱾ ᱟᱵᱚ ᱚᱠᱚᱭ ᱠᱚ ᱳᱰᱤᱥᱟ ᱨᱮ ᱩᱱᱠᱩ ᱫᱚ ᱳᱰᱤᱭᱟᱹ ᱛᱮ, ᱵᱮᱸᱜᱚᱞ ᱨᱤᱱ ᱠᱚ ᱵᱟᱝᱜᱟᱞ ᱛᱮ, ᱟᱥᱟᱢ ᱨᱤᱱ ᱠᱚ ᱟᱥᱟᱢᱤᱡᱽ ᱛᱮ ᱟᱨ ᱵᱤᱦᱟᱨ ᱥᱟᱶᱛᱮ ᱡᱷᱟᱨᱠᱷᱚᱸᱰ ᱨᱤᱱ ᱠᱚᱫᱚ ᱦᱤᱸᱱᱫᱤ ᱮᱢᱟᱱ ᱯᱚᱱᱚᱛ ᱛᱷᱚᱠ ᱚᱞ ᱯᱟᱲᱦᱟᱣ ᱰᱟᱦᱟᱨ ᱛᱮ ᱜᱚᱭᱚᱱ ᱦᱩᱭ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱥᱟᱦᱮᱵᱽ ᱚᱞᱚᱜ ᱰᱟᱦᱟᱨ ᱦᱚᱸ ᱚᱠᱚᱭ ᱠᱚᱫᱚ ᱠᱚ ᱯᱟᱸᱡᱟ ᱟᱠᱟᱫ ᱜᱮᱭᱟ ᱾ ᱢᱮᱱᱢᱟ ᱠᱚ, ᱟᱯᱱᱟᱨ ᱟᱠᱟᱫ ᱜᱮᱭᱟ ᱾ ᱤᱠᱷᱟᱹᱱ ᱟᱵᱚᱣᱟᱜ ᱯᱟᱹᱨᱥᱤ ᱞᱟᱹᱜᱤᱫ ᱚᱞ ᱜᱮ ᱵᱟᱝ ᱛᱟᱦᱮᱸ ᱠᱟᱱ ᱛᱮ ᱚᱱᱠᱟ ᱦᱟᱬᱟᱜ ᱮᱴᱠᱮ ᱴᱚᱢᱮ ᱫᱚ ᱱᱤᱛ ᱧᱮᱞ ᱧᱟᱢᱚᱜ ᱠᱟᱱᱟ ᱾ ᱤᱠᱷᱟᱹᱱ ᱛᱮᱦᱮᱧ ᱚᱠᱛᱚ ᱵᱚᱫᱚᱞ ᱟᱠᱟᱱᱟ ᱾ ᱚᱞ ᱜᱩᱨᱩ ᱯᱟᱹᱨᱥᱤ ᱥᱤᱧ ᱪᱟᱸᱫᱚ ᱨᱚᱜᱷᱩᱱᱟᱛᱷ ᱢᱩᱨᱢᱩ, ᱱᱚᱶᱟ ᱨᱮᱭᱟᱜ ᱟᱱᱟᱴ ᱠᱚᱭ ᱫᱤᱥᱟᱹ ᱧᱟᱢ ᱫᱟᱲᱮᱭᱟᱫ ᱛᱟᱦᱮᱸ ᱾ ᱚᱱᱟᱛᱮ ᱟᱵᱚ ᱡᱟᱱᱟᱢ ᱯᱟᱹᱨᱥᱤ ᱱᱟᱹᱯᱤᱛ ᱜᱚᱲᱦᱚᱱ ᱟᱠᱟᱫᱟᱭ "ᱚᱞ ᱪᱤᱠᱤ" ᱧᱩᱛᱤᱢ ᱪᱤᱠᱤ ᱾ ᱡᱟᱦᱟᱸ ᱫᱟᱨᱟᱭ ᱛᱮ ᱠᱷᱟᱞᱤ ᱟᱵᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱩᱢᱩᱝ ᱫᱚ ᱵᱟᱝ ᱫᱷᱟᱹ ᱨᱛᱤ ᱡᱮᱜᱮᱛ ᱨᱮᱭᱟᱜ ᱥᱟᱱᱟᱢ ᱯᱟᱹᱨᱥᱤ ᱜᱮ ᱱᱚᱶᱟ ᱪᱤᱠᱤ ᱛᱮ ᱵᱷᱟᱹᱜᱤ ᱛᱮ ᱟᱨ ᱥᱩᱡᱩᱛ ᱥᱟᱹᱦᱤᱡ ᱚᱞ ᱨᱟᱠᱟᱵ ᱜᱟᱱ ᱠᱮᱭᱟ ᱾ ᱱᱚᱶᱟ ᱞᱮᱠᱟᱱ ᱦᱟᱦᱟᱲᱟ ᱠᱟᱛᱷᱟ ᱟᱨ ᱜᱚᱨᱚᱵᱽ ᱨᱮᱱᱟᱜ ᱟᱨ ᱪᱮᱫ ᱦᱩᱭ ᱠᱮᱭᱟ??

ᱵᱟᱹᱭ ᱵᱟᱹᱭᱛᱮ ᱡᱩᱜᱽ ᱥᱟᱞᱟᱜ ᱟᱵᱚᱣᱟᱜ ᱚᱞ ᱯᱟᱲᱦᱟᱣᱵᱽ ᱨᱮᱭᱟᱜ ᱨᱟᱹᱥᱠᱟᱹ ᱵᱟᱹᱲᱛᱤ ᱤᱫᱤᱼᱭᱟᱠᱟᱱᱟ ᱾ ᱟᱵᱚ ᱦᱚᱸ ᱚᱞ ᱯᱟᱲᱦᱟᱣ ᱠᱟᱛᱮ ᱱᱩᱠᱨᱤᱼᱪᱟᱹᱠᱨᱤ ᱠᱚ ᱧᱟᱢ ᱠᱟᱛᱮ ᱜᱤᱫᱟᱹᱨ ᱠᱚ ᱯᱤᱫᱟᱹᱨ ᱠᱚ ᱵᱷᱟᱹᱜᱤ ᱟᱥᱲᱟ ᱠᱚᱨᱮ ᱯᱟᱲᱦᱟᱣ ᱦᱚᱪᱚ ᱠᱚ ᱨᱮᱭᱟᱜ ᱫᱟᱣ ᱵᱚ ᱧᱟᱢ ᱮᱫᱟ ᱾ ᱱᱚᱸᱰᱮ ᱞᱟᱹᱭ ᱛᱟᱨᱟ ᱜᱮ ᱵᱩᱜᱤᱭᱟ ᱪᱤ, ᱚᱞ ᱯᱟᱲᱦᱟᱣ ᱠᱟᱛᱮ ᱡᱚᱛᱚ ᱪᱟᱹᱠᱨᱤ ᱱᱩᱠᱨᱤ ᱵᱚᱱ ᱧᱟᱢ ᱟᱠᱟᱫᱟ, ᱚᱱᱟ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ ᱾ ᱧᱟᱢᱚᱜ ᱠᱟᱱᱟ ᱪᱮ ᱫᱟᱣ ᱢᱮᱱᱟᱜ ᱟᱱᱟ ᱢᱮᱱᱛᱮᱧ ᱞᱟᱹᱭ ᱥᱚᱫᱚᱨ ᱮᱫᱟ ᱾ ᱚᱱᱟᱛᱮ ᱱᱤᱛ ᱟᱵᱚᱨᱤᱱ ᱵᱚᱭᱦᱟᱼᱢᱤᱥᱤ ᱠᱚ ᱵᱟᱡᱟᱨ ᱱᱟᱜᱟᱨ ᱠᱚᱨᱮ ᱛᱟᱦᱮᱸᱱ ᱠᱟᱱᱟ ᱠᱚ ᱾ ᱟᱹᱥᱩᱞᱚᱜ ᱠᱟᱱᱟ ᱠᱚ ᱾ ᱤᱠᱷᱟᱹᱱ ᱡᱟᱦᱟᱸᱭ ᱟᱹᱛᱩ ᱫᱤᱥᱚᱢ ᱨᱮ ᱢᱮᱱᱟᱜ ᱠᱚᱣᱟ, ᱩᱱᱠᱩ ᱦᱚᱸ ᱟᱵᱚ ᱡᱟᱹᱛᱤ ᱥᱟᱶᱛᱟ ᱨᱤᱱ ᱢᱮᱱᱛᱮ ᱩᱯᱩᱨᱩᱢ ᱢᱮᱱᱟᱜ ᱛᱟᱠᱚᱣᱟ ᱾ ᱠᱷᱟᱹᱞᱤ ᱟᱹᱥᱩᱞᱚᱜ ᱨᱮᱭᱟᱜ ᱰᱟᱦᱟᱨ ᱜᱮ ᱡᱩᱫᱟᱹ ᱟᱠᱟᱱᱟ ᱾ ᱢᱮᱱᱠᱷᱟᱱ ᱟᱹᱥᱩᱞ ᱟᱨ ᱟᱹᱥᱩᱞ ᱨᱮᱭᱟᱜ ᱰᱟᱦᱟᱨ ᱫᱚ ᱚᱞ ᱯᱟᱲᱦᱟᱣ ᱜᱮᱭᱟᱱ ᱫᱟᱲᱮ ᱛᱮᱜᱮ ᱵᱚᱫᱚᱞᱚᱜ ᱠᱟᱱᱟ ᱾ ᱚᱱᱟᱛᱮ ᱚᱞᱚᱜ ᱯᱟᱲᱦᱟᱣ ᱨᱮᱱᱟᱜ ᱜᱚᱨᱚᱡᱽ ᱦᱚᱸ ᱵᱟᱹᱲᱛᱤᱭᱟᱠᱟᱱᱟ ᱾ ᱨᱟᱹᱥᱠᱟᱹ ᱦᱚᱸ ᱥᱟᱨᱥᱟᱣ ᱟᱠᱟᱱᱟ ᱾ ᱚᱱᱟ ᱞᱟᱹᱜᱤᱫ ᱥᱚᱨᱠᱟᱨ ᱦᱚᱸ ᱟᱵᱚ ᱡᱟᱹᱛᱤ ᱨᱤᱱ ᱦᱳᱲ ᱠᱚ ᱚᱞ ᱯᱟᱲᱦᱟᱣ ᱠᱟᱠᱚ ᱞᱟᱹᱜᱤᱫ ᱵᱤᱱ ᱠᱟᱹᱣᱰᱤ ᱛᱮ ᱚᱞᱚᱜ ᱯᱟᱲᱦᱟᱣ ᱨᱮᱭᱟᱜ ᱯᱚᱨᱛᱚᱱ ᱦᱚᱸᱭ ᱮᱛᱚᱦᱚᱵ ᱟᱠᱟᱫᱟ ᱾ ᱟᱥᱨᱚᱢ ᱵᱟᱝᱢᱟ ᱥᱮᱵᱟᱥᱨᱚᱢ ᱠᱚᱨᱮ ᱜᱤᱫᱽᱨᱟᱹ ᱠᱚ ᱛᱟᱦᱮᱸ ᱠᱟᱛᱮ ᱡᱚᱢ ᱧᱩ ᱧᱟᱢ ᱠᱟᱛᱮ ᱠᱚ ᱛᱟᱦᱮᱸᱱ ᱠᱟᱱᱟ ᱾ ᱴᱟᱠᱟ ᱠᱟᱹᱣᱰᱤ ᱪᱮᱫ ᱦᱚᱸ ᱵᱟᱝ ᱮᱢ ᱦᱩᱭᱩᱜ ᱠᱟᱱᱟ ᱾ ᱟᱢ ᱟᱯᱱᱟᱨ ᱛᱮ ᱚᱞᱚᱜ ᱯᱟᱲᱦᱟᱣᱵ ᱨᱮᱭᱟᱜ ᱰᱟᱦᱟᱨ ᱮᱢ ᱯᱟᱸᱡᱟ ᱠᱮᱫ ᱠᱷᱟᱱ ᱜᱮ ᱦᱚᱨ ᱫᱚ ᱞᱟᱰᱟᱜ ᱟᱠᱟᱱᱟ ᱾ ᱱᱤᱛ ᱟᱭᱢᱟ ᱞᱮᱠᱟᱱ ᱟᱥᱲᱟ ᱠᱚ ᱵᱤᱨᱫᱟᱹᱜᱟᱲ ᱠᱚ ᱵᱮᱨᱮᱫ ᱟᱠᱟᱱᱟ ᱾ ᱡᱟᱦᱟᱸ ᱨᱮ ᱟᱹᱫᱤᱵᱟᱹᱥᱤ ᱠᱚ ᱞᱟᱹᱜᱤᱫ ᱴᱟᱠᱟ ᱠᱟᱹᱣᱰᱤ ᱵᱟᱝ ᱮᱢ ᱠᱟᱛᱮ ᱦᱚᱸ ᱚᱞ ᱯᱟᱲᱦᱟᱣ ᱪᱮ ᱜᱮᱭᱟᱱ ᱥᱮᱭᱟᱱ ᱦᱟᱨᱟᱭ ᱨᱮᱭᱟᱜ ᱰᱟᱦᱟᱨ ᱛᱮ ᱛᱟᱲᱟᱢ ᱜᱟᱱ ᱜᱟᱱᱚᱜ ᱠᱟᱱᱟ ᱾ ᱜᱚᱲᱯᱚᱲᱛᱟ ᱤᱧᱟᱜ ᱢᱚᱱᱚᱛ ᱛᱮᱫᱚ ᱱᱤᱛ ᱯᱚᱲᱦᱚᱱᱚᱜ ᱟᱨ ᱥᱮᱪᱮᱫᱚᱜ ᱨᱮᱭᱟᱜ ᱠᱟᱹᱢᱤᱦᱚᱨᱟ ᱥᱟᱹᱜᱩᱱ ᱟᱠᱟᱱᱟ ᱢᱮᱱᱛᱮ ᱢᱮᱱ ᱜᱟᱱᱚᱜᱼᱟ ᱾

ᱤᱠᱷᱟᱹᱱ ᱹᱹᱹᱹᱹᱹᱹᱹᱹᱹᱹᱹᱹᱹᱹ ᱤᱠᱷᱟᱹᱱ ᱡᱟᱦᱟᱸ ᱫᱚ ᱱᱤᱛ ᱡᱩᱜᱽ ᱨᱮ ᱟᱵᱚ ᱥᱟᱱᱟᱢ ᱠᱚ ᱞᱟᱹᱜᱤᱫ ᱟᱹᱰᱤ ᱢᱟᱨᱟᱝ ᱠᱟᱛᱷᱟ ᱩᱭᱦᱟᱹᱨ ᱵᱷᱟᱵᱽᱱᱟ ᱠᱟᱛᱮ ᱵᱤᱪᱟᱹᱨ ᱠᱟᱛᱮ ᱚᱞ ᱯᱟᱲᱦᱟᱣ ᱨᱮᱭᱟᱜ ᱰᱟᱦᱟᱨ ᱟᱵᱚᱫᱚ ᱯᱟᱸᱡᱟ ᱛᱮ ᱦᱩᱭ ᱟᱵᱚᱱᱟ ᱾ ᱵᱟᱝᱠᱷᱟᱱ ᱟᱵᱚ ᱥᱟᱱᱟᱢ ᱠᱚ ᱜᱮᱭᱟᱱ ᱛᱮ ᱵᱟᱝ ᱵᱚᱱ ᱞᱟᱥᱮᱨ ᱫᱟᱲᱮᱭᱟ ᱠᱮᱭᱟ ᱾ ᱱᱚᱝᱠᱟ ᱱᱟᱥᱮ ᱚᱞ ᱯᱟᱲᱦᱟᱣ ᱠᱟᱛᱮ ᱦᱩᱰᱤᱧ ᱜᱟᱹᱫᱤ ᱦᱩᱰᱤᱧ ᱡᱩᱲᱩ ᱟᱢᱮᱴ ᱜᱮᱵᱚᱱ ᱜᱟᱱ ᱠᱮᱭᱟ ᱾ ᱤᱠᱷᱟᱹᱱ ᱞᱚᱭᱚᱝ ᱪᱮ ᱢᱟᱨᱟᱝ ᱡᱩᱲᱩ ᱧᱟᱢ ᱨᱮᱫᱚ ᱟᱱᱟᱴ ᱧᱮᱞ ᱧᱟᱢᱚᱜ ᱠᱟᱱᱟ ᱾ ᱚᱱᱟᱫᱚ ᱟᱵᱚ ᱵᱟᱝ ᱵᱚᱱ ᱜᱟᱱ ᱮᱫᱟ ᱪᱮ ᱵᱟᱝ ᱵᱚᱱ ᱞᱟᱥᱮᱨ ᱦᱟᱛᱟᱝ ᱟᱱᱟ, ᱚᱱᱠᱟᱱ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ ᱾ ᱠᱷᱟᱴᱚ ᱫᱚ ᱥᱮᱪᱮᱫᱚᱜ ᱨᱮᱭᱟᱜ ᱦᱚᱨ ᱯᱟᱸᱡᱟ ᱾ ᱯᱩᱥᱴᱟᱹ ᱥᱟᱹᱦᱤᱡ ᱞᱟᱹᱭ ᱥᱚᱫᱚᱨ ᱛᱮᱫᱚ ᱟᱵᱚ ᱟᱵᱚᱣᱟᱜ ᱯᱟᱹᱨᱥᱤ ᱚᱞ ᱛᱮ ᱵᱟᱝ ᱵᱚᱱ ᱠᱮᱴᱮᱡ ᱟᱠᱟᱱ ᱵᱷᱩᱨ ᱮᱴᱟᱜ ᱯᱟᱹᱨᱥᱤ ᱛᱮ ᱠᱮᱴᱮᱡᱚᱜ ᱫᱚ ᱞᱟᱥᱮᱨ ᱦᱟᱛᱟᱝ ᱛᱮᱭᱟᱨ ᱞᱟᱹᱜᱤᱫ ᱟᱱᱟᱴ ᱜᱮ ᱛᱤᱝᱜᱩᱱ ᱠᱟᱱᱟ ᱾ ᱚᱱᱟᱛᱮ ᱢᱮᱱ ᱟᱠᱟᱱᱟ…… Education in Mother Language, Makes a Man Perfect.

ᱤᱠᱷᱟᱹᱱ ᱱᱚᱸᱰᱮ ᱱᱚᱶᱟ ᱠᱟᱛᱷᱟ ᱜᱮ ᱵᱤᱪᱟᱹᱨ ᱢᱟ ᱪᱤ, ᱟᱵᱚ ᱠᱤ ᱟᱵᱚ ᱡᱟᱱᱟᱢ ᱯᱟᱹᱨᱥᱤ ᱛᱮᱵᱚᱱ ᱚᱞ ᱯᱟᱲᱦᱟᱣ ᱟᱠᱟᱱᱟ? ᱞᱟᱹᱱᱟᱹᱭ ᱫᱚ ᱵᱟᱝ ᱜᱮᱹᱹᱹᱹᱹᱹᱹᱹᱹ ᱢᱮᱱᱛᱮ ᱦᱩᱭᱩᱜᱼᱟ ᱾ ᱚᱱᱟᱛᱮ ᱥᱟᱱᱟᱢ ᱱᱚᱶᱟ ᱫᱤᱥᱟᱹ ᱧᱟᱢ ᱨᱮᱭᱟᱜ ᱚᱠᱛᱚ ᱠᱟᱱᱟ ᱾ ᱥᱮᱪᱮᱫᱚᱜ ᱨᱮᱭᱟᱜ ᱜᱟᱵᱮ ᱠᱟᱛᱷᱟ ᱥᱟᱱᱟᱢ ᱵᱟᱰᱟᱭ ᱟᱠᱟᱫ ᱜᱮ ᱨᱮᱦᱚᱸ ᱡᱟᱱᱟᱢ ᱯᱟᱹᱨᱥᱤ ᱛᱮ ᱥᱮᱪᱮᱫᱚᱜ ᱵᱮᱜᱚᱨ ᱞᱟᱥᱮᱨ ᱦᱟᱛᱟᱝ ᱵᱮᱱᱟᱣ ᱫᱚ ᱚᱼᱟᱥᱟ ᱜᱮᱭᱟ ᱾

ᱞᱟᱹᱭ ᱥᱚᱫᱚᱨ ᱜᱮ ᱵᱩᱜᱤᱭᱟ, ᱥᱟᱱᱟᱢ ᱠᱚᱵᱚᱱ ᱵᱟᱰᱟᱭ ᱜᱮᱭᱟ ᱱᱤᱛ ᱟᱵᱚ ᱡᱟᱱᱟᱢ ᱯᱟᱹᱨᱥᱤ, ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱵᱷᱟᱨᱚᱛ ᱫᱤᱥᱚᱢ ᱨᱮᱭᱟᱜ ᱟᱹᱱᱟᱹᱨᱤ ᱛᱷᱚᱠ ᱨᱮ ᱴᱷᱟᱶᱮ ᱧᱟᱢ ᱟᱠᱟᱫᱟ, ᱢᱟᱹᱱᱮ ᱧᱟᱢ ᱟᱠᱟᱫᱟ ᱾ ᱢᱮᱱᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱥᱮᱪᱮᱫ ᱠᱟᱛᱮ ᱦᱚᱸ ᱟᱵᱚ ᱮᱴᱟᱜ ᱯᱟᱹᱨᱥᱤ ᱛᱮ ᱞᱮᱠᱟ ᱜᱮ ᱚᱞ ᱯᱟᱲᱦᱟᱣ ᱠᱟᱛᱮ ᱜᱮᱭᱟᱱ ᱨᱮᱭᱟᱜ ᱰᱟᱦᱟᱨ ᱛᱮ ᱛᱟᱲᱟᱢ ᱜᱟᱱ ᱦᱩᱭ ᱠᱮ ᱜᱮᱭᱟ ᱾ ᱦᱟᱬᱟᱜ ᱫᱚ ᱛᱮᱦᱮᱸᱧ ᱱᱚᱶᱟ ᱧᱮᱞᱚᱜ ᱠᱟᱱᱟ, ᱟᱵᱚ ᱜᱮ ᱟᱵᱚᱣᱟᱜ ᱯᱟᱹᱨᱥᱤ ᱵᱟᱝ ᱵᱚᱱ ᱢᱟᱹᱱᱟᱜ ᱠᱟᱱᱟ ᱾ ᱵᱟᱝᱵᱚᱱ ᱯᱟᱹᱛᱭᱟᱹᱣᱟᱜ ᱠᱟᱱᱟ ᱾ ᱵᱟᱝ ᱵᱚᱱ ᱢᱟᱱᱟᱣ ᱟᱠᱟᱫᱟ ᱟᱨ ᱵᱟᱝ ᱵᱚᱱ ᱩᱨᱩᱢ ᱟᱠᱟᱫᱟ ᱪᱤ, ᱟᱵᱚᱣᱟᱜ ᱯᱟᱹᱨᱥᱤ ᱨᱮᱭᱟᱜ ᱫᱟᱲᱮ ᱛᱤᱱᱟᱹᱜᱼᱟ ᱟᱨ ᱟᱵᱚᱣᱟᱜ ᱪᱤᱠᱤ ᱨᱮᱭᱟᱜ ᱥᱚᱨᱮᱥ ᱛᱤᱱᱟᱹᱜ? ᱟᱵᱚ ᱥᱟᱱᱟᱢ ᱠᱚᱣᱟᱜ ᱫᱤᱥᱟᱹ ᱱᱟᱥᱮ ᱦᱚᱭᱛᱚ ᱵᱟᱝ ᱥᱟᱨᱵᱷᱟᱨᱟᱣ ᱟᱠᱟᱱ ᱛᱮ ᱟᱵᱚ ᱮᱴᱟᱜ ᱡᱟᱹᱛᱤ ᱠᱚᱼᱥᱟᱶ ᱥᱮᱪᱮᱫᱚᱜ ᱛᱩᱞᱟᱹ ᱡᱚᱠᱷᱟ ᱵᱟᱝᱵᱚᱱ ᱵᱟᱨᱟᱵᱟᱹᱨᱤ ᱫᱟᱲᱮᱭᱟᱜ ᱠᱟᱱᱟ ᱾

ᱪᱤᱠᱤ ᱫᱩᱞᱟᱹᱲᱤᱭᱟᱹ ᱪᱤᱠᱤ ᱫᱚ ᱫᱩᱞᱟᱹᱲ ᱢᱮ, ᱡᱚᱛᱚ ᱪᱤᱠᱤ ᱯᱟᱹᱨᱥᱤ ᱜᱮ ᱫᱩᱞᱟᱹᱲ ᱢᱮ, ᱤᱠᱷᱟᱹᱱ ᱡᱟᱱᱟᱢ ᱟᱠᱟᱱ ᱪᱤᱠᱤ, ᱯᱟᱹᱨᱥᱤ, ᱫᱷᱚᱨᱚᱢ, ᱥᱟᱶᱛᱟ ᱟᱨ ᱥᱟᱶᱦᱮᱫ ᱫᱚ ᱵᱟᱹᱲᱛᱤ ᱟᱨ ᱯᱩᱭᱞᱩ ᱫᱩᱞᱟᱹᱲ ᱢᱮ ᱾ ᱚᱱᱟᱛᱮ ᱱᱤᱛ, ᱫᱮᱞᱟᱝ ᱚᱞᱚᱜ ᱯᱚᱲᱦᱚᱱ ᱨᱮᱭᱟᱜ ᱦᱚᱨ ᱰᱟᱦᱟᱨ ᱵᱚᱱ ᱯᱟᱸᱡᱟᱭᱟ ᱪᱮ ᱜᱟᱬᱟ ᱠᱚ ᱛᱟᱵᱚᱱ ᱵᱚᱱ ᱯᱟᱸᱡᱟ ᱦᱚᱪᱚ ᱠᱚᱣᱟ ᱾ ᱚᱱᱟᱫᱚ ᱦᱩᱭᱩᱜ ᱠᱟᱱᱟ ᱯᱩᱭᱞᱩ ᱛᱮ ᱟᱵᱚ ᱟᱵᱚ ᱯᱟᱹᱨᱥᱤ ᱛᱮ ᱟᱨ "ᱚᱞ ᱪᱤᱠᱤ" ᱛᱮ ᱢᱟᱬᱟᱝ ᱥᱮᱪᱮᱫ ᱠᱟᱛᱮ ᱮᱴᱟᱜ ᱪᱤᱠᱤ ᱛᱮ ᱵᱟᱝᱢᱟ ᱯᱟᱹᱨᱥᱤ ᱛᱮ ᱥᱮᱪᱮᱫᱚᱜ ᱨᱮ ᱢᱚᱱ ᱵᱚᱱ ᱞᱟᱜᱟᱣᱟ ᱾ ᱮᱴᱟᱜ ᱯᱟᱹᱨᱥᱤ ᱛᱮ ᱚᱞᱚᱜ ᱥᱟᱶᱼᱥᱟᱶᱛᱮ ᱟᱵᱚ ᱯᱟᱹᱨᱥᱤ, ᱟᱵᱚ ᱪᱤᱠᱤ ᱛᱮ ᱥᱮᱪᱮᱫᱚᱜ ᱨᱮ ᱢᱚᱱ ᱵᱚ ᱟᱹᱜᱩᱭᱟ ᱾ ᱮᱱᱠᱷᱟᱱ ᱵᱟᱹᱭ ᱵᱟᱹᱭ ᱛᱮ ᱟᱵᱚ ᱞᱟᱥᱮᱨ ᱦᱟᱛᱟᱝ ᱦᱚᱲ ᱵᱮᱱᱟᱣ ᱨᱮᱭᱟᱜ ᱦᱚᱨ ᱰᱟᱦᱟᱨ ᱧᱟᱢ ᱮᱱᱟ ᱢᱮᱱᱛᱮ ᱵᱟᱰᱟᱭ ᱦᱩᱭᱩᱜᱼᱟ ᱾ ᱮᱱᱠᱷᱟᱱ ᱡᱚᱥ ᱫᱚ ᱱᱚᱶᱟ ᱦᱩᱭᱩᱜᱼᱟ ᱪᱤ, ᱡᱟᱱᱟᱢ ᱯᱟᱹᱨᱥᱤ ᱛᱮ ᱥᱮᱪᱮᱫᱚᱜ ᱨᱮᱭᱟᱜ ᱫᱟᱲᱮ ᱟᱯᱱᱟᱨ ᱢᱚᱱᱮᱼᱢᱮᱫ ᱨᱮ ᱴᱚᱜ ᱠᱟᱛᱮ ᱵᱩᱥᱟᱹᱲ ᱜᱟᱱ ᱨᱮᱭᱟᱜ ᱠᱟᱛᱷᱟ ᱥᱟᱹᱜᱩᱱ ᱠᱮᱭᱟ ᱾ ᱮᱱᱠᱷᱟᱱ ᱡᱟᱦᱟᱸᱭ ᱡᱟᱦᱟᱸ ᱚᱞᱚᱜ ᱜᱮ ᱚᱞᱚᱜ ᱠᱟᱱᱟᱭ ᱚᱱᱟ ᱚᱞ ᱯᱟᱲᱦᱟᱣ ᱟᱨᱦᱚᱸ ᱵᱟᱹᱲᱛᱤ ᱜᱟᱱ ᱠᱮᱭᱟᱭ ᱟᱨ ᱵᱟᱰᱟᱭ ᱧᱟᱢ ᱨᱮᱭᱟᱜ ᱫᱟᱲᱮ ᱥᱟᱨᱥᱟᱣᱵᱽ ᱛᱟᱭᱟ ᱾ ᱮᱱᱠᱷᱟᱱ ᱵᱤᱱᱤᱰ ᱨᱮ ᱚᱨᱡᱚ ᱦᱚᱸ ᱵᱷᱟᱹᱜᱤ ᱦᱩᱭᱩᱜ ᱛᱟᱭᱟ ᱾ ᱮᱱᱠᱷᱟᱱ ᱟᱜᱟᱢ ᱨᱮ ᱮᱴᱟᱜ ᱠᱚ ᱥᱟᱞᱟᱜ ᱜᱮᱭᱟᱱ ᱞᱟᱰᱷᱟᱹᱭ ᱨᱮ ᱡᱤᱛᱠᱟᱹᱨ ᱦᱩᱭᱩᱜ ᱛᱟᱭᱟ ᱾

ᱱᱚᱶᱟ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱨ "ᱚᱞ ᱪᱤᱠᱤ" ᱛᱮ ᱚᱞᱚᱜ ᱫᱚ ᱢᱚᱴᱚᱨ ᱜᱟᱹᱰᱤ ᱨᱮᱭᱟᱜ "ᱤᱸᱡᱤᱱ ᱚᱭᱮᱞ" ᱞᱮᱠᱟᱭ ᱠᱟᱹᱢᱤᱭᱟ ᱾ ᱟᱨᱦᱚᱸ ᱵᱟᱰᱟᱭ ᱛᱟᱦᱮᱸᱱ ᱢᱟ, ᱢᱟᱬᱛᱮ ᱥᱟᱬᱮᱥ ᱨᱮ ᱯᱟᱲᱦᱟᱣ ᱧᱟᱢ ᱟᱠᱟᱫ ᱠᱩᱲᱤ ᱦᱚᱯᱚᱱ ᱟᱨ ᱠᱚᱲᱟ ᱦᱚᱯᱚᱱ ᱠᱤᱱᱟᱜ ᱦᱳᱲᱢᱚ ᱨᱮ "ᱮᱠᱥᱹᱮᱠᱥᱼᱮᱠᱥᱹᱚᱟᱭ" (XX & XY) Chromosome ᱢᱮᱱᱟᱜ ᱟᱠᱟᱫᱟ ᱾ ᱤᱠᱷᱟᱹᱱ ᱥᱟᱹᱨᱤ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ ᱪᱤ, ᱚᱱᱟ ᱠᱤᱱ ᱫᱚ ᱟᱠᱚ ᱞᱟᱹᱜᱤᱫ ᱫᱚ ᱵᱟᱝᱵᱟᱰᱟᱭ ᱧᱟᱢ ᱠᱟᱛᱷᱟ ᱠᱟᱱᱟ ᱾ ᱪᱮᱫᱟᱜ ᱪᱮ ᱚᱱᱠᱟ ᱥᱚᱫᱚᱨ ᱛᱮᱢᱟ ᱚᱱᱟ ᱠᱤᱱ ᱢᱟ ᱤᱸᱜᱽᱞᱤᱥ ᱨᱮᱭᱟᱜ ᱚᱠᱷᱚᱨ ᱠᱟᱱᱟ ᱾ ᱧᱩᱛᱩᱢ ᱫᱚ ᱵᱟᱝ ᱠᱟᱱᱟ ᱾ ᱤᱠᱷᱟᱹᱱ ᱚᱱᱟ ᱠᱨᱳᱢᱚᱡᱚᱢ ᱨᱮᱭᱟᱜ ᱧᱩᱛᱩᱢ ᱫᱚ ᱟᱵᱚ ᱥᱟᱶᱛᱟ ᱟᱹᱰᱤ ᱢᱟᱬᱟᱝ ᱠᱷᱚᱱ ᱜᱮ ᱵᱟᱰᱟᱭ ᱟᱹᱜᱩ ᱟᱠᱟᱫᱟᱭ ᱾ ᱚᱱᱟᱛᱮ, ᱡᱟᱦᱟᱸ ᱱᱤᱛ ᱧᱮᱞ ᱧᱟᱢᱚᱜ ᱠᱟᱱᱟ, ᱚᱱᱟ ᱥᱟᱱᱟᱢ ᱠᱚ ᱟᱯᱱᱟᱨᱟᱜ ᱛᱮᱥᱟᱨ ᱢᱮᱫ ᱛᱮ ᱧᱮᱞ ᱧᱟᱢ, ᱵᱟᱰᱟᱭ ᱧᱟᱢ ᱟᱨ ᱫᱤᱥᱟᱹ ᱧᱟᱢ ᱜᱟᱱ ᱨᱮᱭᱟᱜ ᱛᱚᱦᱚᱨ ᱧᱟᱢ ᱜᱮ ᱢᱟᱨᱟᱝ ᱠᱟᱛᱷᱟ ᱾ ᱚᱱᱟᱜᱮ ᱢᱟᱨᱟᱝ ᱫᱷᱟᱹᱲ ᱥᱩᱛᱩᱨ ᱫᱚ ᱾ ᱵᱟᱰᱟᱭ ᱛᱟᱦᱮᱸᱱ ᱢᱟ ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱯᱟᱹᱨᱥᱤ ᱥᱩᱢᱩᱝ ᱫᱚ ᱵᱟᱝ ᱠᱟᱱᱟ ᱵᱳᱸᱜᱟ ᱯᱟᱹᱨᱥᱤ ᱠᱟᱱᱟ ᱾ ᱚᱱᱠᱟ ᱜᱮ "ᱚᱞ ᱪᱤᱠᱤ" ᱦᱚᱸ ᱠᱷᱟᱹᱞᱤ ᱪᱤᱠᱤ ᱥᱩᱢᱩᱝ ᱫᱚ ᱵᱟᱝ ᱠᱟᱱᱟ ᱾ ᱥᱚᱛ ᱫᱟᱲᱮᱭᱟᱱ ᱪᱤᱠᱤ ᱠᱟᱱᱟ ᱾ ᱱᱚᱶᱟ ᱠᱤᱱ ᱨᱮ ᱟᱯᱞᱮ ᱠᱟᱛᱮ ᱛᱟᱲᱟᱢ ᱞᱮᱠᱷᱟᱱ ᱥᱟᱶᱟᱨ ᱰᱟᱦᱟᱨ ᱯᱟᱸᱡᱟ ᱜᱟᱱ ᱠᱮ ᱦᱩᱭᱩᱜᱼᱟ ᱾ ᱵᱩᱜᱤ ᱛᱮ ᱛᱟᱦᱮᱸᱜᱟᱱ ᱨᱮᱭᱟᱜ ᱫᱟᱲᱮ ᱟᱵᱚᱨᱮ ᱡᱟᱜ ᱜᱟᱱ ᱠᱚᱜᱼᱟ ᱾ ᱟᱵᱚ ᱵᱩᱜᱤ ᱨᱮ ᱛᱟᱦᱮᱸᱱ ᱨᱮᱭᱟᱜ ᱥᱟᱶᱟᱨ ᱫᱟᱲᱮ ᱧᱟᱢ ᱠᱚᱜᱼᱟ ᱾ ᱮᱱᱫᱚ ᱢᱟᱹᱱᱢᱤ ᱡᱚᱱᱚᱢ ᱨᱮᱭᱟᱜ ᱥᱚᱲᱚᱢ ᱧᱟᱢ ᱦᱩᱭ ᱠᱮᱭᱟ ᱾ ᱦᱳᱲ ᱦᱚᱯᱚᱱ ᱨᱮᱭᱟᱜ ᱢᱟᱨᱮ ᱩᱯᱩᱨᱩᱢ ᱰᱟᱦᱟᱨ ᱯᱟᱸᱡᱟ ᱠᱟᱛᱮ ᱮᱴᱟᱜ ᱡᱟᱹᱛᱤ ᱦᱚᱲ ᱠᱚ ᱯᱟᱹᱰᱩ ᱠᱚ ᱨᱮᱭᱟᱜ ᱟᱨ ᱟᱵᱚ ᱡᱤᱛᱠᱟᱹ ᱨᱚᱜ ᱨᱮᱭᱟᱜ ᱠᱟᱛᱷᱟ ᱥᱟᱹᱜᱩᱱ ᱦᱩᱭ ᱠᱮᱭᱟ ᱾