ᱠᱩᱥᱩᱢᱤ/ᱨᱟᱭᱨᱚᱝᱯᱩᱨ (᱑᱙ᱹ᱐᱙ᱹ᱒᱐᱒᱖) ᱺ ᱟᱹᱫᱤᱢ ᱟᱹᱫᱤᱵᱟᱹᱥᱤ ᱦᱳ ᱡᱟᱹᱛᱤ ᱵᱤᱨᱟᱹᱫᱟᱹᱨᱤ ᱦᱳᱱ ᱠᱚ ᱢᱩᱫ ᱨᱮ ᱱᱤᱛ ᱡᱩᱢᱤᱫᱚᱜ, ᱪᱤᱨᱜᱟᱹᱞᱚᱜ ᱟᱨ ᱥᱮᱪᱮᱫᱚᱜ ᱨᱮᱭᱟᱜ ᱚᱠᱛᱚ ᱥᱮᱴᱮᱨ ᱟᱠᱟᱱᱟ ᱾ ᱮᱱᱠᱷᱟᱱ ᱥᱟᱱᱟᱢ ᱟᱠᱟᱱ ᱡᱟᱹᱛᱤ, ᱥᱟᱶᱛᱟ, ᱫᱷᱚᱨᱚᱢ, ᱞᱟᱠᱪᱟᱨ ᱟᱨ ᱯᱟᱹᱨᱥᱤ ᱮᱢᱟᱱ ᱠᱚ ᱨᱮᱭᱟᱜ ᱱᱤᱛ ᱵᱟᱱᱪᱟᱣ ᱟᱨ ᱞᱟᱲᱟᱣᱱᱟ ᱦᱩᱭ ᱠᱮᱭᱟ᱾ ᱚᱱᱟ ᱞᱟᱹᱜᱤᱫ ᱱᱤᱛ ᱨᱤᱱ ᱦᱟᱨᱟ ᱡᱩᱣᱟᱹᱱ ᱠᱚ ᱚᱞᱚᱜ ᱯᱚᱲᱦᱚᱱ ᱨᱮᱭᱟᱜ ᱰᱟᱦᱟᱨ ᱯᱟᱸᱡᱟᱭ ᱥᱟᱶᱛᱮ ᱟᱯᱱᱟᱨ ᱡᱟᱹᱛᱤ ᱟᱨ ᱯᱟᱹᱨᱥᱤ ᱨᱮ ᱵᱟᱹᱲᱛᱤ ᱫᱩᱞᱟᱹᱲ ᱡᱚᱲᱟᱣ ᱨᱮᱱᱟᱜ ᱚᱠᱛᱚ ᱥᱮᱴᱮᱨ ᱟᱠᱟᱱᱟ᱾ ᱱᱚᱝᱠᱟᱱ ᱥᱟᱹᱜᱩᱱ ᱟᱨ ᱥᱟᱶᱟᱨ ᱫᱤᱥᱟᱹ ᱦᱳ ᱯᱟᱹᱨᱥᱤ ᱞᱟᱹᱜᱤᱫ "ᱩᱨᱟᱝ ᱪᱤᱠᱤ" ᱜᱚᱲᱦᱚᱱ ᱟᱠᱟᱫ ᱯᱳᱸᱰᱤᱛ ᱞᱟᱠᱳ ᱵᱚᱫᱚᱨᱟᱼᱦᱟᱜ ᱑᱐᱗ ᱟᱱᱟᱜ ᱡᱟᱱᱟᱢ ᱢᱟᱦᱟᱸ ᱢᱟᱱᱟᱣ ᱚᱠᱛᱚ ᱨᱮ ᱢᱟᱨᱟᱝ ᱯᱮᱲᱟ ᱠᱚᱣᱟᱜ ᱥᱟᱸᱫᱮᱥ ᱛᱟᱦᱮᱸᱠᱟᱱᱟ ᱾ ᱱᱚᱝᱠᱟᱱ ᱵᱤᱪᱟᱹᱨ ᱩᱪᱷᱟᱹᱱ ᱚᱠᱛᱮ ᱥᱟᱱᱟᱢ ᱢᱟᱬᱛᱮ ᱠᱚ ᱱᱚᱶᱟ ᱫᱤᱥᱟᱹ ᱟᱨᱵᱟᱝ ᱠᱟᱛᱷᱟ ᱨᱮ ᱨᱮᱵᱮᱱ ᱟᱨ ᱥᱟᱨᱦᱟᱣ ᱨᱮᱭᱟᱜ ᱛᱤ ᱛᱷᱟᱭᱚ ᱜᱚᱴᱟᱯᱟᱲᱟ ᱟᱸᱫᱚᱲ ᱞᱮᱱᱟ ᱾
● ᱦᱳ ᱯᱟᱹᱨᱥᱤ ᱞᱟᱹᱜᱤᱫ “ᱩᱨᱟᱹᱝ ᱪᱤᱠᱤ” ᱜᱚᱲᱦᱚᱱ ᱞᱮᱫᱟᱭ
● ᱦᱳ ᱟᱹᱫᱤᱢ ᱟᱹᱫᱤᱵᱟᱹᱥᱤ ᱠᱚ ᱞᱟᱹᱜᱤᱫ ᱢᱤᱫ ᱪᱟᱸᱫᱚ ᱵᱚᱸᱜᱟ
● ᱥᱟᱱᱟᱢ ᱠᱚ ᱪᱤᱨᱜᱟᱹᱞ ᱠᱟᱛᱮ ᱥᱮᱪᱮᱫᱚᱜ ᱞᱟᱹᱜᱤᱫ ᱠᱤᱨᱭᱟᱹ
● ᱡᱩᱣᱟᱹᱱ ᱠᱚ ᱞᱟᱹᱜᱤᱫ ᱡᱩᱢᱤᱫᱚᱜ ᱟᱨ ᱪᱤᱨᱜᱟᱹ ᱞᱚᱜ ᱨᱮᱭᱟᱜ ᱫᱤᱥᱟᱹ
ᱵᱟᱰᱟᱭ ᱧᱟᱢ ᱟᱠᱟᱱᱟ ᱪᱤ, ᱵᱷᱚᱸᱡᱽ ᱫᱤᱥᱚᱢ ᱨᱮᱭᱟᱜ ᱠᱩᱥᱩᱢᱤ ᱵᱚᱱᱚᱛ ᱵᱷᱩᱴᱠᱟᱵᱟᱹ ᱫᱤ ᱯᱚᱸᱪᱮᱛ ᱡᱟᱯᱟᱜ ᱥᱭᱟᱢᱥᱩᱸᱫᱚᱨ ᱜᱚᱨᱟᱢ ᱨᱮᱭᱟᱜ ᱞᱟᱠᱳ ᱵᱟᱫᱽᱨᱟ ᱪᱷᱚᱠ ᱴᱷᱮᱱ ᱦᱳ ᱯᱟᱹᱨᱥᱤ ᱜᱩᱨᱩ ᱟᱨ ᱯᱳᱱᱰᱤᱛ ᱞᱟᱠᱳ ᱵᱟᱫᱽᱨᱟ ᱦᱟᱜ ᱑᱐᱗ ᱟᱱᱟᱜ ᱥᱟᱹᱜᱩᱱ ᱡᱟᱱᱟᱢ ᱢᱟᱦᱟᱸ ᱢᱟᱱᱟᱣ ᱦᱩᱭ ᱥᱟᱹᱛ ᱟᱠᱟᱱᱟ ᱾ ᱠᱟᱹᱢᱤᱦᱚᱨᱟ ᱮᱛᱚᱦᱚᱵ ᱨᱮ ᱜᱚᱨᱟᱢ ᱨᱤᱱᱤᱡᱽ ᱫᱤᱣᱨᱤ ᱡᱟᱹᱛᱤᱭᱟᱹᱨᱤ ᱥᱮᱨᱣᱟ ᱞᱮᱠᱟᱛᱮ ᱵᱳᱸᱜᱟ ᱵᱩᱨᱩ ᱦᱩᱭ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱢᱟᱹᱱᱟᱱ ᱯᱮᱲᱟ ᱟᱭᱟᱨ ᱵᱤᱫᱷᱟᱭᱚᱠ ᱢᱟᱹᱱ ᱯᱨᱚᱦᱚᱞᱟᱫᱽ ᱯᱩᱨᱛᱤ, ᱦᱳᱟᱞᱵᱚᱢ ᱥᱴᱟᱨ ᱢᱟᱹᱱ ᱚᱨᱚᱵᱤᱸᱫᱚ ᱴᱤᱭᱩ, ᱟᱭᱟᱨ ᱯᱷᱚᱣᱩᱡᱽ ᱢᱟᱹᱱ ᱱᱩᱸᱫᱩᱨᱟᱢ ᱵᱟᱨᱫᱟ, ᱢᱟᱹᱱ ᱞᱩᱸᱫᱩᱨᱟ ᱵᱟᱱᱨᱟ, ᱢᱟᱥᱴᱚᱨ ᱡᱚᱴᱤᱭᱟ ᱥᱟᱝᱭᱟ, ᱢᱟᱹᱱ ᱜᱷᱚᱱᱚᱥᱭᱟᱢ ᱯᱤᱸᱜᱩᱣᱟ, ᱢᱟᱹᱱ ᱨᱟᱢᱮᱥᱚᱨ ᱠᱳᱸᱰᱟᱝᱠᱮᱞ ᱥᱟᱶᱛᱮ ᱢᱟᱹᱱ ᱫᱟᱢᱳᱫᱚᱨ ᱯᱩᱨᱛᱤ ᱮᱢᱟᱱ ᱯᱳᱸᱰᱤᱛ ᱞᱟᱠᱳ ᱵᱚᱫᱽᱨᱟᱼᱦᱟᱜ ᱩᱱᱩᱭᱦᱟᱹᱨ ᱴᱷᱟᱶ ᱨᱮ ᱦᱚᱢᱚᱨ ᱵᱟᱦᱟ ᱪᱟᱞ ᱠᱟᱛᱮ ᱢᱟᱹᱱ ᱟᱨ ᱜᱳᱰ ᱡᱚᱦᱟᱨ ᱠᱚ ᱪᱟᱞ ᱞᱮᱫᱟ ᱾ ᱱᱚᱶᱟ ᱥᱟᱹᱜᱩᱱ ᱠᱟᱹᱢᱤᱦᱚᱨᱟ ᱚᱠᱛᱚ ᱨᱮ ᱥᱟᱶᱛᱟᱨᱤ ᱨᱩᱼᱮᱱᱮᱡᱽ ᱞᱮᱛᱟᱲ ᱛᱟᱦᱮᱸᱠᱟᱛᱮ ᱥᱟᱱᱟᱢ ᱠᱚᱣᱟᱜ ᱢᱚᱱᱮ ᱡᱤᱣᱤ ᱪᱩᱦᱩᱞ ᱦᱩᱭ ᱞᱮᱱᱟ ᱾
ᱚᱱᱟ ᱛᱟᱭᱚ ᱢᱤᱫ ᱢᱟᱬᱛᱮ ᱢᱤᱫᱩᱱ ᱦᱩᱭ ᱥᱟᱹᱛ ᱞᱮᱱᱟ ᱾ ᱚᱱᱟ ᱢᱤᱫᱩᱱ ᱨᱮ ᱥᱟᱱᱟᱢ ᱠᱚᱣᱟᱜ ᱢᱚᱱᱚᱛ ᱞᱮᱠᱟᱛᱮ ᱳᱨᱟᱝ ᱪᱤᱛᱤ ᱨᱤᱱᱤᱡᱽ ᱜᱚᱲᱦᱚᱱᱤᱭᱟᱹ ᱯᱳᱸᱰᱤᱛ ᱞᱟᱠᱳ ᱵᱚᱫᱽᱨᱟ ᱦᱟᱜ ᱢᱤᱫ ᱢᱩᱴᱷᱟᱹᱱ ᱜᱚᱲᱦᱚᱱ ᱛᱚᱨᱟᱣ ᱠᱟᱜ ᱨᱮᱭᱟᱜ ᱠᱟᱛᱷᱟ ᱜᱚᱴᱟ ᱞᱮᱱᱟ ᱾ ᱱᱚᱶᱟ ᱠᱟᱹᱢᱤᱦᱚᱨᱟ ᱞᱟᱹᱜᱤᱫ ᱱᱟᱶᱟ ᱡᱩᱣᱟᱹᱱ ᱠᱚ ᱢᱟᱬᱟᱝ ᱦᱤᱡᱩᱜ ᱞᱟᱹᱠᱛᱤ ᱠᱟᱱᱟ ᱾ ᱮᱱᱮᱱᱟ ᱱᱚᱝᱠᱟᱱ ᱠᱟᱹᱢᱤ ᱩᱥᱟᱹᱨᱟ ᱥᱟᱹᱜᱩᱱ ᱦᱩᱭ ᱠᱮᱭᱟ ᱾ ᱚᱱᱟ ᱠᱟᱛᱷᱟ ᱜᱮ ᱥᱟᱱᱟᱢ ᱠᱚ ᱦᱮᱸᱥᱟᱹᱨ ᱮᱱᱟ ᱟᱨ ᱟᱜᱟᱢ ᱨᱮ ᱱᱚᱶᱟ ᱴᱷᱟᱶ ᱨᱮ ᱩᱨᱟᱹᱝ ᱪᱤᱠᱤ ᱨᱤᱱᱤᱡᱽ ᱜᱚᱲᱦᱚᱱᱤᱭᱟᱹ ᱞᱟᱠᱳ ᱵᱟᱫᱽᱨᱟ ᱜᱚᱝᱠᱮ ᱞᱟᱹᱜᱤᱫ ᱢᱤᱫ ᱥᱟᱹᱜᱩᱱᱼᱥᱟᱶᱟᱨ ᱢᱟᱹᱱ ᱦᱩᱭ ᱠᱮᱭᱟ ᱢᱮᱱᱛᱮ ᱵᱤᱪᱟᱹᱨ ᱜᱚᱴᱟ ᱟᱠᱟᱱᱟ ᱾ ᱢᱩᱪᱟᱹᱫ ᱨᱮ ᱢᱟᱹᱱ ᱞᱚᱸᱢᱵᱳᱫᱚᱨ ᱵᱟᱱᱨᱟ ᱥᱮᱴᱮᱨ ᱛᱟᱦᱮᱸᱠᱟᱱ ᱥᱟᱱᱟᱢ ᱠᱚ ᱫᱤᱥᱟᱹ ᱠᱟᱛᱮ ᱥᱟᱨᱦᱟᱣᱱᱟ ᱟᱲᱟᱝ ᱮ ᱪᱟᱞ ᱞᱮᱫᱟ ᱟᱨ ᱠᱟᱹᱢᱤᱦᱚᱨᱟ ᱥᱟᱹᱛ ᱥᱟᱹᱜᱩᱱ ᱞᱮᱱᱟ ᱾
