ᱡᱚᱲᱮᱥᱚᱨ / ᱵᱟᱞᱮᱥᱚᱨ (᱑᱓ᱹ᱐᱙ᱹ᱒᱐᱒᱖) ᱺ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱻᱚᱞᱤᱭᱟᱹ ᱜᱟᱶᱛᱟ, ᱳᱫᱤᱥᱟ ᱪᱟᱸᱜᱟ ᱨᱮᱭᱟᱜ ᱙ ᱟᱱᱟᱝ ᱢᱟᱬᱛᱮ ᱢᱤᱫᱩᱱ ᱟᱨ ᱥᱟᱶᱦᱮᱫ ᱦᱮᱞᱢᱮᱞ ᱨᱮᱭᱟᱜ ᱥᱟᱹᱜᱩᱱ ᱚᱠᱛᱚ ᱨᱮ ᱛᱤᱱᱤᱱ ᱚᱱᱚᱞᱤᱭᱟᱹ ᱠᱚᱣᱟᱜ ᱱᱟᱶᱟ ᱯᱚᱛᱚᱵ ᱠᱚ ᱩᱪᱷᱟᱹᱱ ᱥᱚᱫᱚᱨ ᱦᱩᱭ ᱟᱠᱟᱱᱟ ᱾ ᱚᱱᱟ ᱠᱚ ᱢᱩᱫ ᱨᱮ ᱢᱟᱹᱱ ᱢᱚᱝᱜᱚᱞ ᱴᱩᱰᱩ ᱛᱤᱠᱤᱱᱟᱜ ᱠᱟᱹᱦᱱᱤ ᱯᱚᱛᱚᱵ ᱼ "ᱢᱟᱹᱱᱢᱤ ᱫᱷᱤᱨᱤ ᱮᱱᱟ", ᱢᱟᱹᱱ ᱥᱳᱨᱚᱡᱽ ᱠᱩᱢᱟᱨ ᱥᱚᱨᱮᱱ ᱛᱤᱠᱤᱱᱟᱜ ᱢᱤᱫ ᱜᱟᱢᱟᱢ ᱯᱚᱛᱚᱵ ᱼ "ᱵᱟᱨᱚᱱ", ᱛᱤᱨᱞᱟᱹ ᱚᱱᱚᱞᱤᱭᱟᱹ ᱢᱟᱹᱱᱤᱡᱽ ᱫᱩᱠᱷᱤᱱᱤ ᱢᱩᱨᱢᱩ ᱛᱤᱠᱤᱱᱟᱜ ᱦᱚᱸ ᱢᱤᱫ ᱜᱟᱢᱟᱢ ᱯᱚᱛᱚᱵ ᱼ "ᱥᱮᱛᱟᱜ ᱛᱤᱠᱤᱱ ᱛᱟᱨᱟᱥᱤᱧ", ᱰᱨᱹ ᱜᱚᱝᱜᱟᱫᱷᱚᱨ ᱦᱟᱸᱥᱫᱟᱜ ᱛᱤᱠᱤᱱᱟᱜ ᱵᱟᱨ ᱡᱚᱲ ᱠᱟᱹᱦᱱᱤ ᱼ "ᱵᱷᱟᱹᱜᱽᱱᱟᱹᱰᱤᱦᱤ ᱨᱮᱭᱟᱜ ᱛᱟᱠᱮᱨ", ᱢᱤᱫ ᱛᱤᱨᱞᱟᱹ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱢᱟᱹᱱᱤ ᱥᱟᱞᱜᱮ ᱠᱤᱥᱠᱩ ᱛᱤᱠᱤᱱᱟᱜ ᱚᱱᱚᱞ ᱜᱟᱵᱟᱱ ᱜᱚᱲᱯᱚᱲᱛᱟ ᱧᱩᱛᱩᱢ ᱫᱚ "ᱚᱱᱚᱞ ᱥᱤᱠᱲᱤ" ᱨᱮ ᱠᱤᱱ ᱪᱷᱟᱹᱴᱭᱟᱹᱨ ᱟᱠᱟᱫᱟ, ᱚᱱᱠᱟ ᱜᱮ ᱵᱷᱩᱵᱚᱱᱮᱥᱚᱨ ᱨᱮᱱ ᱟᱭᱟᱨ OFS ᱟᱹᱢᱟᱹᱞᱤᱭᱟᱹ ᱰᱨᱹ ᱫᱟᱥᱢᱟᱛ ᱢᱩᱨᱢᱩ ᱛᱤᱠᱤᱱᱟᱜ ᱢᱤᱫ ᱚᱱᱚᱬᱦᱮ ᱯᱚᱛᱚᱵ ᱧᱩᱛᱩᱢ ᱫᱚ "ᱮᱵᱷᱮᱱ ᱥᱟᱠᱣᱟ" ᱾ ᱚᱱᱠᱟ ᱜᱮ ᱢᱟᱹᱱ ᱥᱤᱨᱟᱹᱢ ᱴᱩᱰᱩ ᱛᱤᱠᱤᱱᱟᱜ ᱚᱱᱚᱞ ᱜᱟᱵᱟᱱ ᱯᱚᱛᱚᱵ ᱧᱩᱛᱩᱢ ᱫᱚ "ᱥᱟᱱᱛᱟᱲᱤ ᱠᱷᱚᱸᱫᱽᱨᱚᱱ ᱚᱱᱚᱞ ᱥᱟᱶᱦᱮᱫ" ᱟᱨ ᱢᱟᱹᱱ ᱫᱩᱨᱜᱟᱹ ᱥᱚᱨᱮᱱ ᱛᱤᱠᱤᱱᱟᱜ ᱥᱚᱨᱮᱥ ᱜᱟᱵᱟᱱ ᱢᱤᱫ ᱦᱚᱲ ᱥᱮᱨᱮᱧ ᱯᱚᱛᱚᱵ "ᱡᱚᱲ ᱛᱤᱨᱭᱟᱹᱣ" ᱩᱪᱷᱟᱹᱱ ᱥᱟᱹᱜᱩᱱ ᱟᱠᱟᱱᱟ ᱾ ᱢᱚᱦᱟᱨᱟᱡᱟ ᱥᱨᱤᱨᱟᱢ ᱪᱚᱸᱫᱽᱨᱚ ᱵᱷᱚᱸᱡᱽᱰᱮᱣ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡᱽ ᱥᱟᱶᱼᱯᱨᱚᱯᱷᱮᱥᱚᱨ ᱰᱨᱹ ᱡᱚᱛᱤᱱᱫᱨᱚᱱᱟᱛᱷ ᱵᱮᱥᱨᱟ ᱛᱤᱠᱤᱱᱟᱜ ᱚᱱᱚᱞ ᱦᱮᱞᱟᱣ ᱯᱚᱛᱚᱵ ᱼ "ᱛᱚᱞᱟᱥ" ᱥᱟᱶᱛᱮ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱢᱟᱹᱱ ᱢᱚᱫᱚᱱ ᱦᱮᱸᱢᱵᱽᱨᱚᱢ ᱛᱤᱠᱤᱱᱟᱜ ᱛᱤᱱᱤᱱ ᱚᱱᱚᱬᱦᱮ ᱠᱚ ᱨᱮᱱᱟᱜ ᱜᱟᱵᱟᱱ ᱢᱤᱫ ᱯᱚᱛᱚᱵ ᱞᱮᱠᱟᱛᱮ ᱩᱪᱷᱟᱹᱱ ᱨᱮᱭᱟᱜ ᱫᱤᱥᱟᱹ ᱠᱟᱛᱮ ᱟᱨ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱨᱮ ᱟᱹᱠᱤᱱᱟᱜ ᱠᱩᱨᱩᱢᱩᱴᱩ ᱥᱚᱫᱚᱨ ᱞᱟᱹᱜᱤᱫ ᱱᱚᱶᱟ ᱥᱟᱹᱜᱩᱱ ᱠᱟᱹᱢᱤᱦᱚᱨᱟ ᱟᱹᱦᱤᱵᱟᱹᱦᱤ ᱨᱮ "ᱫᱟᱨᱮ ᱩᱢᱩᱞ" ᱧᱩᱛᱩᱢ ᱛᱮ ᱢᱤᱫ ᱚᱱᱚᱬᱦᱮ ᱯᱚᱛᱚᱵ ᱢᱟᱬᱛᱮ ᱠᱚ ᱞᱟᱹᱜᱤᱫ ᱠᱤᱱ ᱩᱪᱷᱟᱹᱱ ᱥᱚᱫᱚᱨ ᱦᱚᱪᱚ ᱟᱠᱟᱫᱟ ᱾
