ᱱᱮᱥ ᱒᱐᱒᱕ ᱫᱚ ᱚᱞᱪᱤᱠᱤ ᱨᱮᱱᱟᱜ ᱥᱟᱭ ᱥᱮᱨᱢᱟ ᱥᱤᱧ ᱚᱛ ᱫᱤᱥᱚᱢ ᱨᱮᱱᱟᱜ ᱟᱭᱢᱟ ᱜᱟᱶᱛᱟ / ᱥᱮᱢᱞᱮᱫ ᱵᱤᱨᱫᱟᱹ ᱜᱟᱲ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱠᱚᱨᱮ ᱟᱹᱰᱤ ᱨᱟᱹᱥᱠᱟ ᱥᱮᱞᱮᱫ ᱥᱟᱯᱲᱟᱣ ᱟᱠᱷᱲᱟ ᱛᱟᱞᱟ ᱛᱮᱵᱚᱱ ᱢᱟᱱᱚᱛ ᱤᱫᱤᱭᱮᱫᱼᱟ ᱾ ᱡᱟᱦᱟᱸ ᱫᱚ ᱚᱞ ᱜᱩᱨᱩ ᱯᱚᱸ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱑᱙᱒᱕ ᱥᱟᱹᱦᱤᱛ ᱨᱮ ᱢᱤᱫᱴᱟᱹᱝ ᱯᱟᱹᱨᱥᱤ ᱞᱟᱹᱜᱤᱫ ᱢᱤᱫᱴᱟᱹᱝ ᱪᱤᱠᱤ ᱚᱞᱪᱤᱠᱤ ᱛᱤᱱᱟᱹᱜ ᱪᱚ ᱛᱯᱤᱥ ᱠᱟᱛᱮ, ᱫᱤᱥᱚᱢ ᱫᱤᱥᱚᱢ ᱫᱟᱬᱟ ᱠᱟᱛᱮ, ᱛᱤᱱᱟᱹᱜ ᱦᱟᱨᱠᱮᱛ ᱥᱟᱥᱮᱛ ᱥᱟᱦᱟᱣ ᱠᱟᱛᱮ ᱢᱤᱫᱴᱟᱹᱝ ᱡᱟᱹᱛ ᱞᱟᱹᱜᱤᱫ ᱢᱤᱫᱴᱟᱹᱝ ᱯᱟᱹᱨᱥᱤ ᱵᱟᱧᱪᱟᱣ ᱞᱟᱹᱜᱤᱫ ᱥᱚᱱᱟ ᱠᱷᱚᱱ ᱦᱚᱸ ᱜᱚᱱᱚᱝᱟᱱ ᱫᱩᱨᱤᱵᱮ ᱪᱟᱞ ᱚᱴᱚ ᱟᱠᱟᱣᱟᱫ ᱵᱚᱱᱟ ᱟᱨ ᱚᱱᱟ ᱫᱩᱨᱩᱵᱽ ᱫᱚ "ᱚᱞᱪᱤᱠᱤ" ᱾
ᱱᱮᱥ ᱒᱐᱒᱕ ᱫᱚ ᱚᱞᱪᱤᱠᱤ ᱥᱤᱨᱡᱚᱱ ᱨᱮᱱᱟᱜ ᱥᱟᱭ ᱥᱮᱨᱢᱟ ᱜᱚᱴᱟ ᱵᱷᱟᱨᱚᱛ ᱫᱤᱥᱚᱢ ᱨᱮ ᱦᱩᱰᱤᱧ /ᱦᱟᱯᱲᱟᱜ ᱥᱟᱯᱲᱟᱣ ᱟᱠᱷᱲᱟ ᱛᱟᱞᱟᱛᱮ ᱢᱟᱱᱚᱛ ᱮᱦᱚᱵ ᱟᱠᱟᱱᱟ ᱾ ᱟᱭᱢᱟ ᱜᱟᱶᱛᱟ / ᱜᱚᱱᱚᱴᱷᱚᱱ / ᱨᱟᱡᱽ ᱟᱹᱨᱤ ᱜᱟᱹᱠᱷᱩᱲ ᱠᱚ / ᱯᱟᱹᱨᱥᱤ ᱥᱟᱶᱦᱮᱫ ᱫᱩᱞᱟᱹᱲᱤᱭᱟᱹ ᱠᱚ ᱵᱷᱮᱜᱟᱨ ᱵᱷᱮᱜᱟᱨ ᱯᱚᱱᱚᱛ ᱯᱟᱹᱪᱤᱛ ᱠᱚᱨᱮ ᱨᱟᱹᱥᱠᱟᱹ ᱥᱮᱞᱮᱫ ᱢᱟᱱᱚᱛ ᱞᱟᱹᱜᱤᱫ ᱢᱟᱱᱚᱛ ᱠᱩᱢᱩᱴ ᱠᱚ ᱵᱮᱨᱮᱫ ᱟᱠᱟᱫᱼᱟ ᱾ ᱱᱚᱣᱟ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱹᱜᱤᱫ ᱟᱹᱰᱤ ᱜᱚᱨᱚᱵᱽ ᱟᱨ ᱨᱟᱹᱥᱠᱟᱹᱣᱟᱱ ᱥᱮᱨᱢᱟ ᱜᱮ ᱠᱟᱱᱟ ᱥᱮ "ᱚᱞᱪᱤᱠᱤ ᱥᱟᱭ ᱥᱮᱨᱢᱟ" ᱠᱟᱱ ᱜᱮᱭᱟ ᱾
ᱢᱤᱫᱴᱟᱹᱝ ᱢᱟᱹᱱᱢᱤ ᱞᱟᱹᱜᱤᱫ ᱩᱢᱮᱨ ᱞᱮᱠᱟᱛᱮ ᱥᱟᱭ ᱥᱮᱨᱢᱟ ᱫᱚ ᱟᱹᱰᱤ ᱡᱤᱞᱤᱧ ᱟᱨ ᱢᱟᱨᱟᱝ ᱜᱮᱭᱟ, ᱛᱚᱵᱮ ᱢᱤᱫᱴᱟᱹᱝ ᱡᱟᱹᱛ ᱨᱮᱱᱟᱜ ᱯᱟᱹᱨᱥᱤ ᱵᱟᱧᱪᱟᱣ ᱞᱟᱜᱤᱫ ᱪᱤᱠᱤ ᱞᱮᱠᱟ ᱛᱮ "ᱚᱞᱪᱤᱠᱤ" ᱞᱟᱹᱜᱤᱫ ᱥᱟᱭ ᱥᱮᱨᱢᱟ ᱩᱢᱮᱨ ᱫᱚ ᱡᱤᱞᱤᱧ ᱢᱮᱱ ᱵᱟᱝ ᱜᱟᱱᱚᱜᱼᱟ ᱾ ᱮᱴᱟᱜ ᱯᱟᱹᱨᱥᱤ ᱨᱮᱱᱟᱜ ᱪᱤᱠᱤ ᱥᱟᱞᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱹᱜᱤᱫ ᱚᱞᱪᱤᱠᱤ ᱛᱩᱞᱟᱹ ᱡᱚᱠᱷᱟ ᱞᱮᱠᱷᱟᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱹᱜᱤᱫ ᱚᱞᱪᱤᱠᱤ ᱫᱚ ᱞᱟᱦᱟᱱᱛᱤ ᱰᱟᱦᱟᱨ ᱛᱟᱲᱟᱢ ᱨᱮᱱᱟᱜ ᱟᱦᱞᱟ ᱧᱮᱞ ᱧᱟᱢᱚᱜᱼᱟ ᱾ ᱮᱴᱟᱜ ᱯᱟᱹᱨᱥᱤ ᱨᱮᱱᱟᱜ ᱪᱤᱠᱤ ᱠᱚᱫᱚ ᱕᱐᱐ ᱥᱮᱨᱢᱟ ᱠᱷᱚᱱ ᱦᱚᱸ ᱵᱟᱹᱲᱛᱤ ᱩᱢᱮᱨ ᱦᱩᱭ ᱟᱠᱟᱱᱟ, ᱚᱱᱟ ᱞᱮᱠᱟᱛᱮ ᱱᱚᱣᱟ ᱢᱤᱫ ᱥᱟᱭ ᱥᱮᱨᱢᱟ ᱨᱮ ᱡᱟᱦᱟᱸ ᱛᱤᱱᱟᱹᱜ ᱪᱷᱟᱨᱟᱣ ᱟᱨ ᱯᱟᱥᱱᱟᱣ ᱦᱩᱭ ᱟᱠᱟᱱᱟ ᱚᱱᱟᱫᱚ ᱟᱹᱰᱤ ᱜᱚᱨᱚᱵᱽ ᱡᱚᱝ ᱨᱮᱱᱟᱜ ᱜᱮ ᱾
ᱟᱭᱢᱟ ᱟᱭᱳ ᱵᱟᱵᱟ ᱠᱚᱣᱟᱜ ᱢᱚᱱᱮᱨᱮ ᱦᱤᱫᱤᱡ ᱦᱤᱡᱩᱜ ᱠᱟᱱᱟ ᱪᱤ ᱥᱟᱱᱛᱟᱲᱤ (ᱚᱞᱪᱤᱠᱤ) ᱛᱮ ᱟᱠᱚᱨᱤᱱ ᱜᱤᱫᱟᱹᱨ ᱠᱚ ᱚᱞᱚᱜ ᱯᱟᱲᱦᱟᱣ ᱠᱚ ᱪᱷᱩᱴᱟᱹᱣᱚᱜ ᱠᱷᱟᱱ ᱩᱱᱠᱩᱣᱟᱜ ᱢᱤᱱᱮ ᱦᱤᱨᱤᱡ ᱯᱟᱹᱥᱤᱨ ᱠᱟᱛᱮ ᱢᱩᱬ ᱯᱟᱲᱦᱟᱣ ᱨᱮ ᱮᱴᱠᱮᱴᱚᱬᱮ ᱦᱩᱭ ᱠᱟᱛᱮ ᱵᱤᱨᱫᱟᱹ ᱜᱟᱲ ᱨᱮᱠᱚ ᱯᱷᱮᱞ ᱫᱟᱲᱮᱭᱟᱜᱼᱟ ᱾ ᱡᱟᱱᱟᱢ ᱯᱟᱹᱨᱥᱤ ᱞᱟᱹᱜᱤᱫ ᱱᱚᱝᱠᱟᱱ ᱟᱹᱠᱤᱞᱟᱱ ᱦᱚᱲ ᱢᱩᱨᱩᱠ ᱩᱭᱦᱟᱹᱨ ᱫᱚ ᱵᱟᱹᱲᱤᱡ ᱜᱮᱭᱟ ᱾
ᱠᱩᱪᱤ ᱩᱢᱮᱨ ᱨᱮ ᱜᱤᱫᱽᱨᱟᱹ ᱫᱚ ᱟᱭᱢᱟ ᱯᱟᱹᱨᱥᱤ ᱠᱚ ᱪᱮᱫ ᱫᱟᱲᱮᱭᱟᱜᱼᱟ ᱾ ᱥᱮᱬᱟ ᱠᱟᱛᱮ ᱵᱚᱛᱚᱨ ᱞᱟᱡᱟᱣ ᱛᱟᱠᱚ ᱵᱟᱹᱲᱛᱤ ᱤᱫᱤᱜᱼᱟ ᱾ ᱱᱤᱛ ᱞᱮᱠᱟᱱ ᱚᱠᱛᱚᱨᱮ ᱢᱤᱫ ᱥᱟᱱᱛᱟᱲ ᱜᱤᱫᱽᱨᱟᱹ ᱡᱩᱫᱤ ᱥᱚᱝᱵᱤᱫᱷᱟᱱ ᱥᱮᱞᱮᱫ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱨ ᱚᱞᱪᱤᱠᱤ ᱵᱟᱭ ᱵᱟᱰᱟᱭ ᱠᱟᱜ ᱠᱷᱟᱱ ᱪᱟᱹᱠᱨᱤ ᱵᱤᱱᱤᱰ ᱦᱮᱯᱨᱟᱣ ᱠᱚᱨᱮ ᱯᱷᱮᱞ ᱥᱟᱶᱛᱮ ᱟᱡᱟᱜ ᱟᱜᱟᱢ ᱱᱟᱣᱟ ᱵᱟᱯᱞᱟ ᱜᱷᱟᱨᱚᱸᱡᱽ ᱡᱤᱭᱚᱱ ᱨᱮᱦᱚᱸᱭ ᱯᱷᱮᱞ ᱫᱟᱲᱮᱭᱟᱜᱼᱟ ᱾
ᱡᱟᱱᱟᱢ ᱯᱟᱹᱨᱥᱤ ᱥᱟᱱᱛᱟᱲᱤ ᱟᱨ ᱚᱞᱪᱤᱠᱤ ᱛᱮᱜᱮ ᱟᱵᱚ ᱥᱟᱱᱛᱟᱲ ᱠᱚᱫᱚ ᱟᱵᱚᱣᱟᱜ ᱯᱟᱹᱨᱥᱤ ᱥᱟᱶᱛᱟ ᱟᱹᱨᱤᱪᱟᱹᱞᱤ ᱞᱟᱠᱪᱟᱨ ᱢᱟᱱᱟᱣ ᱵᱟᱛᱟᱣ ᱟᱨ ᱥᱟᱵ ᱫᱚᱦᱚᱛᱮ ᱟᱜᱟᱢ ᱫᱤᱱ ᱨᱮ ᱜᱤᱫᱽᱨᱟᱹ ᱡᱩᱛ ᱥᱟᱺᱦᱤᱡ ᱠᱚ ᱵᱟᱸᱧᱪᱟᱣ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱾ ᱚᱱᱟᱛᱮ ᱥᱟᱱᱟᱢ ᱥᱟᱱᱛᱟᱲ ᱜᱮ ᱚᱞᱪᱤᱠᱤ ᱪᱮᱫ ᱞᱟᱹᱜᱤᱫ ᱞᱟᱹᱠᱛᱤ ᱥᱮᱴᱮᱨ ᱟᱠᱟᱱᱟ ᱾
ᱚᱞᱪᱤᱠᱤ ᱥᱟᱭ ᱥᱮᱨᱢᱟ ᱥᱟᱨ ᱠᱚᱜ, ᱥᱟᱹᱜᱩᱱ ᱠᱚᱜ ᱼ ᱥᱟᱹᱜᱩᱱ ᱠᱚᱜ ᱢᱤᱫ ᱯᱟᱹᱨᱥᱤ ᱢᱤᱫ ᱪᱤᱠᱤ, ᱦᱚᱨᱮ ᱩᱫᱩᱜᱽ ᱚᱞᱪᱤᱠᱤ ᱾
