(ᱚᱣᱟᱝ ᱚᱱᱚᱞᱤᱭᱟᱹ ᱜᱟᱫᱮᱞ ᱨᱮ ᱑᱒/᱐᱘/᱒᱐᱒᱖ ᱠᱷᱚᱱ ᱑᱙/᱐᱘/᱒᱐᱒᱖ ᱨᱮ ᱥᱮᱴᱮᱨ ᱟᱠᱟᱱ ᱥᱟᱹᱜᱩᱱ ᱥᱟᱸᱫᱮᱥ ᱱᱚᱣᱟ ᱞᱮᱠᱷᱟ ᱨᱮ ᱥᱚᱫᱚᱨ ᱦᱩᱭ ᱮᱱᱟ)
ᱢᱟᱹᱱ ᱠᱩᱥᱟᱹᱫᱷᱚᱨ ᱦᱟᱸᱥᱫᱟ – ᱑᱒/᱐᱘/᱒᱐᱒᱖
ᱮᱴᱟᱜ ᱦᱚᱲᱟᱜ ᱵᱷᱟᱹᱞᱟᱹᱭ ᱧᱮᱞᱛᱮ
ᱡᱟᱦᱟᱸᱭ ᱦᱚᱲᱮ ᱠᱩᱥᱤ ᱨᱟᱹᱥᱠᱟᱹᱜ ᱾
ᱵᱷᱟᱹᱜᱤ ᱢᱮᱱᱛᱮ ᱩᱱᱤ ᱦᱚᱲ ᱜᱮ
ᱫᱤᱥᱚᱢ ᱦᱚᱲ ᱴᱷᱮᱱᱮ ᱴᱷᱤᱠᱟᱹᱜ ᱾
ᱦᱤᱸᱥᱟᱹ ᱥᱩᱭᱟᱹ ᱢᱚᱱᱮ ᱫᱚ
ᱚᱱᱛᱚᱨ ᱡᱤᱣᱤᱭ ᱞᱚ ᱛᱚᱨᱚᱡ ᱾
ᱡᱤᱭᱤᱱ ᱨᱮ ᱡᱩᱫᱟᱹᱥ ᱦᱚᱲ ᱫᱚ ᱩᱱᱤ
ᱡᱟᱦᱟᱸᱭ ᱴᱷᱮᱱ ᱢᱮᱱᱟᱜ ᱫᱩᱞᱟᱹᱲ ᱜᱚᱨᱚᱡᱽ ᱾
*****
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱒/᱐᱘/᱒᱐᱒᱖
ᱫᱤᱱ ᱫᱚ ᱦᱤᱡᱩᱜ
ᱫᱤᱱ ᱫᱚ ᱥᱮᱱᱚᱜ
ᱫᱤᱱ ᱫᱚ ᱥᱚᱢᱟᱱ ᱵᱟᱝᱜᱮ ᱛᱟᱦᱮᱸᱱᱟ
ᱚᱠᱛᱚ ᱦᱚᱸ ᱛᱚ ᱵᱟᱭ ᱛᱟᱹᱸᱜᱜᱤᱭᱟ ᱾
ᱥᱮᱛᱟᱜ ᱛᱚᱨᱟ ᱥᱟᱡᱟᱣ ᱟᱠᱟᱱ ᱞᱟᱪᱷᱟ ᱱᱚᱱᱚᱞ
ᱥᱟᱡᱟᱣ ᱨᱮᱜᱮ ᱛᱟᱦᱮᱸᱭᱮᱱ
ᱢᱚᱱᱮ ᱨᱮᱱᱟᱜ ᱠᱩᱠᱢᱩ ᱠᱟᱛᱷᱟ
ᱵᱟᱝ ᱜᱮ ᱯᱷᱚᱴᱮᱞ ᱞᱮᱱ ᱾
*****
ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱒/᱐᱘/᱒᱐᱒᱖
ᱦᱚᱲᱟᱜ ᱵᱩᱜᱤ ᱵᱟᱹᱲᱤᱡ ᱧᱮᱞᱛᱮ
ᱟᱢ ᱫᱚ ᱩᱛᱤ ᱥᱩᱛᱤᱢ ᱨᱤᱥᱟᱹᱜ,
ᱠᱟᱹᱢᱤ ᱫᱦᱟᱹᱢᱤ ᱵᱟᱝ ᱥᱟᱱᱟᱢ ᱨᱮ
ᱜᱟᱫᱮᱞ ᱦᱚᱲ ᱠᱷᱚᱱᱮᱢ ᱵᱷᱤᱱᱟᱹᱜ ᱾
ᱦᱚᱲ ᱠᱚ ᱥᱟᱶᱮᱢ ᱢᱮᱥᱟᱜ ᱨᱮ
ᱯᱟᱲᱟᱜ ᱜᱮᱭᱟᱢ ᱡᱩᱲᱩ
ᱠᱟᱹᱢᱤ ᱠᱟᱹᱥᱱᱤ ᱪᱷᱩᱴᱟᱹᱜ ᱨᱮᱢ
ᱟᱨᱡᱟᱣ ᱜᱮᱭᱟᱢ ᱰᱷᱩᱞᱟᱹ ᱯᱮᱨᱮᱡ ᱦᱳᱲᱳ ᱾
*****
ᱢᱟᱹᱱ ᱠᱩᱥᱟᱹᱫᱷᱚᱨ ᱦᱟᱸᱥᱫᱟ – ᱑᱓ᱼ᱐᱘ᱼ᱒᱐᱒᱖
ᱟᱹᱨᱥᱤ ᱨᱮ ᱧᱮᱞᱚᱜ ᱱᱤᱡᱚᱨᱟᱜ ᱨᱩᱯ ᱢᱚᱦᱚᱨ
ᱟᱪᱟᱨ, ᱵᱮᱵᱚᱦᱟᱨ, ᱜᱩᱱ
ᱟᱹᱨᱥᱤ ᱛᱮ ᱵᱟᱭ ᱧᱮᱞ ᱧᱟᱢᱚᱜ ᱾
ᱜᱟᱱᱚᱜ ᱡᱚᱛᱚ ᱵᱚᱫᱚᱞ ᱱᱚᱞ ᱱᱚᱠᱚᱞ
ᱦᱚᱲᱟᱜ ᱪᱩᱨᱤᱛ, ᱵᱮᱵᱷᱟᱨ ᱥᱟᱹᱨᱤ
ᱵᱟᱝ ᱱᱚᱠᱚᱞᱚᱜ ᱾
*****
ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱓ᱼ᱐᱘ᱼ᱒᱐᱒᱖
ᱞᱟᱦᱟᱜ ᱦᱚᱲᱠᱚ ᱞᱟᱦᱟ ᱭᱮᱱᱟ
ᱟᱠᱚᱼᱟᱠᱚᱣᱟᱜ ᱠᱩᱠᱢᱩ ᱠᱩᱸᱵᱟᱹ ᱛᱮ,
ᱛᱟᱭᱚᱢ ᱦᱚᱲᱵᱚᱱ ᱛᱟᱭᱚᱢ ᱟᱠᱟᱱ
ᱦᱤᱸᱥᱟᱹ ᱥᱩᱭᱟᱹ ᱛᱮ ᱾
ᱨᱩᱯ ᱢᱚᱦᱚᱨ ᱧᱮᱞᱚᱜ ᱫᱤᱱᱟᱹᱢ
ᱡᱤᱬᱤᱫ ᱡᱟᱬᱟᱝ ᱟᱹᱨᱥᱤ ᱨᱮ,
ᱢᱚᱱ ᱠᱚᱯᱚᱴ ᱢᱚᱱᱮ ᱵᱷᱤᱛᱤᱨ
ᱵᱟᱝ ᱧᱮᱞᱚᱜ ᱫᱷᱟᱹᱨᱛᱤ ᱨᱮ ᱾
*****
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱓/᱐᱘/᱒᱐᱒᱖
ᱞᱟᱦᱟᱜ ᱦᱚᱨᱛᱮ ᱡᱟᱸᱜᱟᱢ ᱞᱟᱦᱟᱭ
ᱠᱟᱹᱢᱤ ᱠᱟᱛᱮ ᱫᱷᱚᱱᱼᱠᱟᱹᱣᱰᱤᱢ ᱟᱨᱡᱟᱣ
ᱵᱩᱫᱫᱷᱤ ᱦᱟᱛᱟᱝᱮᱢ ᱜᱷᱟᱥᱟᱣ ᱾
ᱦᱤᱸᱥᱟᱹᱼᱱᱤᱥᱟᱹ ᱟᱢᱮᱢ ᱦᱟᱢᱮᱴ
ᱛᱟᱭᱱᱚᱢ ᱥᱮᱫ ᱮᱢ ᱯᱟᱹᱪᱷᱞᱟᱹᱜ
ᱡᱤᱣᱤ ᱦᱚᱲᱢᱚᱢ ᱱᱟᱥᱟᱣ ᱾
*****
ᱢᱟᱹᱱ ᱠᱩᱥᱟᱹᱫᱷᱚᱨ ᱦᱟᱸᱥᱫᱟ – ᱑᱔ᱼ᱐᱘ᱼ᱒᱐᱒᱖
ᱵᱩᱜᱤ ᱦᱩᱭᱩᱜ ᱪᱮ ᱵᱟᱹᱲᱤᱡ
ᱚᱠᱛᱚ ᱪᱟᱠᱟ ᱫᱚ ᱟᱡᱟᱜ ᱟᱹᱪᱩᱨᱚᱜ ᱾
ᱵᱩᱜᱤ ᱚᱠᱛᱚ ᱨᱮ ᱚᱱᱠᱟ
ᱵᱟᱹᱲᱤᱡ ᱟᱞᱚᱢ ᱠᱟᱹᱢᱤ ,
ᱵᱟᱹᱲᱤᱡ ᱚᱠᱛᱚ ᱨᱮ ᱦᱚᱲᱠᱚ
ᱥᱟᱦᱟ ᱥᱟᱹᱸᱜᱤᱧᱚᱜ ᱾
*****
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱔/᱐᱘/᱒᱐᱒᱖
ᱥᱤᱢ ᱨᱟᱜ ᱛᱮ ᱵᱮᱨᱮᱫ ᱢᱮ
ᱥᱮᱛᱟᱜ ᱠᱟᱹᱢᱤ ᱥᱟᱹᱛ ᱜᱚᱫ ᱢᱮ,
ᱱᱤᱨᱚᱲ ᱢᱚᱱ ᱛᱮ ᱵᱚᱸᱜᱟ ᱵᱳᱨᱳ ᱠᱚ
ᱥᱮᱵᱟ ᱫᱮᱵᱟ ᱠᱟᱛᱮ,
ᱥᱚᱛ ᱢᱚᱱ ᱛᱮ ᱟᱢᱟᱜ ᱠᱟᱹᱢᱤ ᱨᱮ
ᱪᱷᱩᱴᱟᱹᱣ ᱜᱚᱫᱚᱜ ᱢᱮ ᱾
*****
ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱔ᱼ᱐᱘ᱼ᱒᱐᱒᱖
ᱨᱟᱠᱟᱵ ᱪᱟᱸᱫᱚᱭ ᱦᱟᱹᱥᱩᱨᱮᱱᱟ
ᱧᱩᱛᱟᱹᱛ ᱥᱮᱴᱮᱨᱮᱱ
ᱠᱤᱫᱩᱜ ᱡᱚᱢ ᱵᱟᱲᱟ ᱠᱟᱛᱮ
ᱱᱤᱛ ᱫᱚ ᱵᱚᱱ ᱡᱟᱹᱯᱤᱫ ᱡᱤᱨᱟᱹᱜ ᱾
ᱠᱟᱹᱢᱤ ᱞᱟᱸᱜᱟ ᱦᱚᱲᱢᱚ ᱡᱤᱣᱤ
ᱜᱚᱴᱟ ᱫᱤᱱ ᱵᱚᱱ ᱠᱷᱟᱴᱟᱜ
ᱚᱱᱟ ᱛᱮᱜᱮ ᱜᱤᱛᱤᱡ ᱛᱚᱨᱟ
ᱡᱟᱹᱯᱤᱫ ᱠᱚᱫᱚ ᱦᱤᱡᱩᱜ ᱾
*****
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱗/᱐᱘/᱒᱐᱒᱖
ᱨᱩᱯᱼᱨᱚᱸᱝ ᱫᱷᱚᱱᱼᱫᱩᱨᱤᱵ
ᱵᱟᱝ ᱛᱟᱦᱮᱸᱱ ᱫᱤᱱ ᱥᱚᱢᱟᱱ ᱾
ᱩᱭᱦᱟᱹᱨ ᱛᱟᱦᱮᱸᱱ ᱦᱚᱲᱠᱚ ᱛᱟᱞᱟ
ᱟᱢᱟᱜ ᱥᱚᱛ ᱠᱟᱹᱢᱤ, ᱟᱞᱟᱭ ᱢᱚᱱᱮ,
ᱫᱟᱭᱟ ᱫᱩᱞᱟᱹᱲ ᱮᱢᱟᱱ ᱾
*****
ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱗ᱼ᱐᱘ᱼ᱒᱐᱒᱖
ᱜᱚᱨᱚᱡ ᱜᱩᱞᱟᱹᱪᱷᱤ ᱢᱚᱱ ᱠᱩᱥᱤ
ᱪᱷᱩᱴᱟᱹᱣ ᱠᱚᱜ ᱢᱮ ᱞᱟᱜᱟᱝ ᱜᱟᱵᱟᱱ
ᱢᱤᱫᱫᱤᱱ ᱦᱤᱞᱚᱜ ᱯᱟᱪᱷᱮᱱ ᱟᱢᱟᱜ
ᱜᱟᱞᱟᱝ ᱵᱟᱦᱟ ᱠᱚ ᱡᱚᱛᱚᱱ ᱾
ᱜᱚᱨᱚᱡᱽ ᱛᱮ ᱥᱟᱡᱟᱣ ᱵᱟᱦᱟ ᱫᱚ
ᱛᱤᱥ ᱦᱚᱸ ᱵᱟᱭ ᱜᱚᱥᱚᱜ
ᱦᱚᱲᱠᱚ ᱛᱟᱞᱟᱨᱮ ᱫᱚᱸᱜᱚᱭ ᱫᱚᱸᱜᱚᱭ
ᱞᱮᱛᱟᱲ ᱜᱮ ᱢᱚᱦᱠᱟᱜ ᱾
*****
ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱘/᱐᱘/᱒᱐᱒᱖
ᱥᱤᱨᱡᱚᱱᱤᱭᱟᱹᱭ
ᱥᱤᱨᱡᱚᱱ ᱟᱠᱟᱫ ᱵᱚᱱ
ᱟᱹᱰᱤ ᱞᱮᱠᱟᱱ ᱡᱤᱣᱤᱭᱟᱱ ᱠᱚ,
ᱢᱟᱹᱱᱢᱤ ᱨᱩᱯ ᱨᱮ ᱢᱮᱱᱟᱜ
ᱟᱢᱟᱜ ᱥᱚᱨᱮᱥ ᱡᱤᱵᱚᱱ ᱾
ᱟᱞᱚᱢ ᱰᱷᱤᱞᱟᱹᱣ ᱛᱟᱢᱟ ᱡᱤᱣᱤᱼᱦᱚᱲᱢᱚ
ᱜᱷᱟᱥᱟᱣ ᱢᱟᱡᱟᱣ ᱢᱮᱛᱟᱢ
ᱵᱩᱫᱫᱷᱤ ᱦᱟᱛᱟᱝ,
ᱥᱚᱨᱮᱥ ᱠᱟᱹᱢᱤ ᱠᱟᱛᱮ
ᱧᱩᱛᱩᱢ ᱫᱚᱦᱚᱭ ᱛᱟᱢ ᱾
*****
᱑᱓ᱹ ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱘ᱼ᱐᱘ᱼ᱒᱐᱒᱖
ᱦᱟᱦᱟᱲᱟ ᱜᱮ ᱥᱤᱨᱡᱚᱱ ᱫᱟᱲᱮ
ᱱᱚᱣᱟ ᱚᱣᱟᱝ ᱛᱟᱞᱟ ᱨᱮ,
ᱦᱟᱦᱟᱲᱟ ᱜᱮ ᱟᱢᱟᱜ ᱡᱟᱱᱟᱢ
ᱢᱟᱹᱱᱢᱤ ᱡᱤᱣᱤ ᱨᱮ ᱾
ᱫᱷᱤ ᱫᱟᱲᱮ ᱟᱹᱠᱤᱞ ᱜᱮᱭᱟᱱ
ᱡᱚᱛᱚᱣᱟᱜ ᱛᱮᱢ ᱯᱩᱨᱩᱱ ᱜᱮ
ᱟᱞᱚᱢ ᱦᱮᱞᱠᱚᱢ ᱠᱚᱜᱼᱟ
ᱫᱟᱲᱮ ᱛᱟᱦᱮᱱ ᱵᱷᱩᱨ
ᱡᱚᱢ ᱢᱮ ᱠᱷᱟᱴᱟᱣ ᱠᱟᱛᱮ ᱜᱮ ᱾
*****
ᱢᱟᱹᱱ ᱡᱤᱛᱮᱱᱫᱽᱨᱟ ᱦᱟᱸᱥᱫᱟᱼ ᱑᱙ᱼ᱐᱘ᱼ᱒᱐᱒᱖
ᱨᱟᱹᱥᱠᱟᱹ ᱨᱮ ᱛᱟᱦᱮᱱ ᱨᱮᱱᱟᱜ
ᱢᱮᱱᱮᱛ ᱱᱚᱣᱟ ᱫᱚ ᱵᱟᱝ ᱠᱟᱱᱟ
ᱡᱮ ᱡᱚᱛᱚᱣᱟᱜ ᱴᱷᱤᱠ ᱜᱮᱭᱟ ᱾
ᱱᱚᱣᱟ ᱨᱮᱱᱟᱜ ᱢᱮᱱᱮᱛ ᱫᱚ
ᱱᱚᱣᱟ ᱠᱟᱱᱟ ᱡᱮ,
ᱟᱢ ᱟᱢᱟᱜ ᱫᱩᱠ ᱠᱷᱚᱱ
ᱪᱮᱛᱟᱱ ᱨᱟᱠᱟᱵ ᱠᱟᱛᱮ
ᱡᱤᱭᱤᱱ ᱠᱷᱟᱸᱰᱟᱣ ᱮᱢ ᱪᱮᱫ ᱠᱮᱫᱟ ᱾
*****
ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ – ᱑᱙ᱼ᱐᱘ᱼ᱒᱐᱒᱖
ᱫᱩᱠ ᱟᱨ ᱥᱩᱠ ᱫᱚ
ᱡᱤᱭᱚᱱ ᱨᱮᱱᱟᱜ ᱜᱟᱴᱮ,
ᱥᱟᱶᱛᱮ ᱠᱤᱱ ᱛᱟᱦᱮᱸ ᱠᱚᱜᱜᱼᱟ
ᱡᱮᱢᱚᱱ ᱥᱟᱹᱲᱤᱢ ᱟᱨ ᱥᱟᱛᱮ ᱾
ᱫᱩᱠ ᱵᱮᱲᱟ ᱨᱮ ᱥᱩᱠᱮ ᱜᱚᱲᱚᱣᱟᱢ
ᱟᱨ ᱥᱩᱠ ᱵᱮᱲᱟ ᱫᱩᱠᱮ ᱜᱚᱲᱚᱣᱟᱢ,
ᱛᱤᱥᱦᱚᱸ ᱵᱟᱠᱤᱱ ᱵᱟᱹᱜᱤᱭᱟᱢᱟ
ᱥᱟᱸᱦᱮᱫ ᱛᱟᱦᱮᱱ ᱵᱷᱩᱨ ᱾
*****
᱑᱖ᱹ ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ – ᱑᱙/᱐᱘/᱒᱐᱒᱖
ᱡᱤᱭᱚᱱ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱨᱮ
ᱧᱟᱢᱚᱜ ᱜᱮᱭᱟ ᱜᱟᱰᱟᱼᱰᱷᱚᱰᱟ ᱡᱟᱹᱱᱩᱢ ᱡᱷᱟᱹᱱᱴᱤ ᱾
ᱦᱤᱡᱩᱜ ᱜᱮᱭᱟ ᱥᱩᱠᱼᱫᱩᱠ
ᱮᱱᱦᱚᱸ ᱞᱟᱦᱟᱜ ᱦᱩᱭᱩᱜ ᱜᱮᱭᱟ
ᱛᱤᱱᱵᱷᱩᱨ ᱥᱟᱰᱮᱜ ᱨᱤᱲᱤᱧ ᱨᱤᱲᱤᱧ
ᱨᱤᱫᱟᱹᱭ ᱨᱮᱱᱟᱜ ᱜᱷᱟᱹᱱᱴᱤ ᱾
*****
Found a mistake in the transcription?
Compare it with the scanned copy and
send us the correction.