ᱡᱟᱣ ᱫᱤᱱ ᱞᱮᱠᱟᱜᱮ ᱥᱟᱹᱛ ᱠᱟᱛᱮ ᱠᱟᱹᱢᱤᱠᱚ
ᱯᱟᱨᱠᱚᱢ ᱨᱤᱧ ᱠᱚᱱᱰᱮᱞ ᱜᱚᱫ ᱟᱠᱟᱱᱟ
ᱯᱷᱚᱱ ᱥᱟᱵᱠᱟᱛᱮ ᱦᱟᱱᱛᱮᱼᱱᱷᱟᱛᱤᱧ ᱴᱷᱮᱞᱟᱣ ᱵᱟᱲᱟᱭᱮᱜᱼᱟ
ᱴᱟᱴᱠᱟ ᱜᱤᱧ ᱧᱮᱞᱧᱟᱢ ᱠᱮᱫ ᱟᱹᱰᱤ ᱢᱟᱨᱟᱝ ᱜᱷᱚᱴᱱᱟ ᱾
ᱞᱤᱸᱜᱤ ᱟᱬᱜᱚᱱ ᱠᱟᱱᱟ ᱞᱚᱥᱚᱫ ᱢᱮᱥᱟ ᱫᱟᱜ ᱵᱚᱛᱚᱨᱜᱮ
ᱜᱩᱲᱫᱟᱣ ᱟᱬᱜᱚᱱ ᱠᱟᱱᱟ ᱫᱷᱤᱨᱤ, ᱟᱹᱛᱩᱜ ᱠᱟᱱᱟᱠᱚ ᱦᱚᱲ
ᱜᱟᱹᱰᱤ ᱢᱚᱴᱚᱨ, ᱢᱟᱨᱟᱝᱼᱢᱟᱨᱟᱝ ᱵᱤᱞᱰᱤᱧ, ᱫᱟᱨᱮ
ᱫᱟᱭᱟᱜᱮ ᱟᱧᱡᱚᱢᱚᱜ ᱠᱟᱱᱟ ᱫᱟᱹᱲᱯᱮ ᱞᱚᱜᱚᱱ ᱨᱚᱲ ᱾
ᱠᱚᱭᱚᱜ ᱛᱷᱤᱨ ᱠᱮᱜᱼᱟᱹᱧ, ᱛᱷᱟᱨᱼᱛᱷᱟᱨᱟᱣ ᱮᱱ ᱛᱤᱧ ᱛᱤ
ᱚᱠᱟᱨᱮᱱᱟᱜ ᱜᱷᱚᱴᱚᱱ ᱟᱹᱰᱤ ᱵᱷᱚᱭᱚᱝᱠᱟᱨ ᱢᱮᱱ ᱠᱟᱛᱮ
ᱧᱮᱞ ᱠᱮᱜᱼᱟᱹᱧ ᱫᱚ ᱱᱮᱯᱟᱲ ᱫᱤᱥᱚᱢ ᱨᱮᱱᱟᱜ ᱠᱟᱱᱟ
ᱛᱨᱤᱥᱩᱲᱤ ᱜᱟᱰᱟ ᱫᱟᱜ ᱞᱟᱞᱮᱪᱟᱯᱮ ᱩᱱᱩᱢ ᱟᱠᱟᱱ ᱛᱮ ᱾
ᱩᱱᱟᱹᱜ ᱠᱮᱴᱮᱡ ᱯᱚᱞᱠᱚ ᱨᱟᱹᱯᱩᱫ ᱞᱟᱺᱫᱩᱲ ᱮᱱᱟ
ᱢᱮᱱ ᱠᱮᱜᱼᱟᱠᱚ ᱜᱞᱮᱥᱤᱭᱟᱨ ᱯᱚᱥᱟᱜ ᱧᱩᱨ ᱮᱱᱟ
ᱫᱷᱩᱸᱜᱤᱭᱟᱹ ᱞᱮᱠᱟ ᱞᱚᱥᱚᱫ ᱢᱮᱥᱟ ᱞᱤᱸᱜᱤ ᱟᱬᱜᱚᱭᱮᱱᱟ
ᱢᱟᱨᱟᱝᱼᱢᱟᱨᱟᱝ ᱪᱟᱹᱴᱟᱹᱱᱤ ᱫᱷᱤᱨᱤᱠᱚ ᱟᱹᱛᱩ ᱮᱫᱤᱭᱮᱱᱟ ᱾
ᱟᱹᱰᱤ ᱦᱚᱲᱟᱜ ᱡᱤᱣᱤ ᱪᱷᱤᱛᱤᱵᱤᱛᱤ ᱟᱫ ᱥᱟᱭ ᱮᱱᱟ
ᱚᱠᱚᱭᱟᱜ ᱜᱚᱡᱽ ᱦᱚᱲᱢᱚ ᱴᱷᱤᱠᱟᱹᱜᱮ ᱵᱟᱭ ᱴᱷᱤᱱᱟᱹᱜ ᱠᱟᱱᱟ
ᱪᱟᱸᱫᱚ ᱵᱚᱝᱜᱟᱦᱟᱜ ᱯᱟᱞᱮ ᱱᱚᱣᱟᱜᱮ ᱵᱚᱨᱟᱛ ᱛᱟᱦᱮᱸᱠᱟᱱᱟ
ᱜᱟᱰᱟ ᱫᱷᱟᱨᱮ ᱨᱮᱱᱟᱜ ᱢᱤᱫ ᱚᱲᱟᱜ ᱜᱮ ᱴᱟᱨᱦᱟᱣ ᱛᱟᱦᱮᱸᱠᱟᱱᱟ ᱾
ᱱᱚᱣᱟ ᱒᱖ ᱚᱜᱚᱥᱴ ᱒᱐᱒᱖ ᱱᱮᱯᱟᱲ ᱨᱮᱱᱟᱜ ᱯᱨᱚᱲᱚᱭ
ᱛᱤᱥ ᱦᱚᱸ ᱵᱟᱭ ᱦᱤᱲᱤᱧᱚᱜᱼᱟ ᱢᱚᱱᱮ ᱡᱤᱣᱤ ᱠᱷᱚᱱ
ᱡᱟᱦᱟᱸᱭ ᱚᱸᱰᱮ ᱢᱮᱱᱟᱭ ᱩᱱᱤᱜᱮ ᱵᱟᱰᱟᱭ ᱚᱱᱟ ᱠᱟᱛᱟ
ᱛᱤᱱᱟᱹᱜ ᱦᱚᱲ ᱫᱚᱠᱚ ᱧᱟᱢ ᱮᱱ ᱞᱚᱥᱚᱫ ᱵᱷᱤᱛᱨᱤ ᱠᱷᱚᱱ ᱾
ᱡᱟᱦᱟᱸᱭᱠᱚ ᱵᱟᱰᱟᱭ ᱧᱟᱢ ᱞᱮᱫ ᱱᱟᱥᱮ ᱪᱷᱚᱲᱮᱼᱪᱷᱚᱲᱮ
ᱡᱤᱣᱤ ᱦᱚᱲᱢᱚ ᱛᱟᱠᱚ ᱩᱱᱠᱩ ᱠᱚ ᱵᱟᱧᱪᱟᱣ ᱠᱮᱫ
ᱫᱟᱹᱲ ᱠᱮᱫ ᱠᱚ ᱞᱮᱸᱜᱮᱫ ᱥᱚᱯᱚᱫ ᱩᱥᱩᱞ ᱡᱟᱭᱜᱟ ᱥᱮᱫ
ᱢᱤᱫ ᱜᱷᱟᱹᱲᱤᱠ ᱨᱮ ᱪᱷᱤᱱ ᱪᱷᱚᱛᱚᱨ ᱥᱟᱭᱮᱱ ᱧᱮᱞ ᱠᱮᱫ ᱮ ᱢᱮᱫ ᱾
ᱚᱠᱚᱭ ᱛᱤᱥᱚᱜ ᱦᱚ ᱵᱟᱠᱚ ᱩᱭᱦᱟᱹᱨ ᱞᱮᱜᱼᱟ ᱱᱚᱝᱠᱟ ᱦᱩᱭᱩᱜᱼᱟ
ᱦᱚᱭ ᱵᱟᱹᱨᱰᱩ, ᱫᱟᱜ, ᱥᱮᱸᱜᱮᱞ ᱫᱚ ᱵᱚᱛᱚᱨᱟᱜ ᱢᱮᱜᱮ
ᱧᱮᱞ ᱠᱮᱫ ᱜᱮᱭᱟᱵᱚᱱ ᱫᱟᱜ ᱨᱮᱭᱟᱜ ᱫᱟᱲᱮ ᱛᱤᱱᱟᱹᱜ
ᱛᱤᱱᱨᱮ ᱪᱮᱫ ᱦᱩᱭᱩᱜᱼᱟ ᱫᱷᱟᱹᱨᱛᱤᱨᱮ ᱚᱦᱚᱢ ᱞᱟᱹᱭ ᱠᱮᱜᱮ ᱾
Found a mistake in the transcription?
Compare it with the scanned copy and
send us the correction.