ᱞᱟᱹᱭᱟᱠᱚ ᱠᱟᱛᱷᱟᱭ ᱛᱤᱥ ᱥᱮᱫᱟᱭ ᱨᱮᱪᱚ
ᱵᱤᱨᱤᱴᱤᱥ ᱠᱚᱢᱯᱟᱹᱱᱤ ᱥᱟᱨᱠᱟᱨ ᱵᱤᱨᱩᱫᱷ ᱨᱮ
ᱦᱩᱞ ᱞᱮᱫᱟ ᱠᱚ ᱦᱟᱯᱲᱟᱢ ᱠᱚ ᱜᱤᱪᱚ
ᱚᱱᱟ ᱠᱷᱟᱹᱛᱤᱨ ᱜᱤᱪᱚ ᱢᱟᱭᱟᱢ ᱜᱟᱰᱟ
ᱟᱹᱛᱩ ᱞᱮᱱᱟ ᱜᱚᱴᱟ ᱯᱟᱲᱟ ᱹᱹᱹᱹᱹᱹᱹᱹᱹᱹ!!
᱑᱘᱕᱕ ᱥᱮᱨᱢᱟ ᱠᱷᱚᱱ ᱞᱟᱦᱟ ᱨᱮ
ᱡᱟᱱᱟᱢ ᱫᱤᱥᱟᱹᱢ ᱛᱟᱵᱚᱱ ᱛᱟᱦᱮᱸ ᱠᱟᱱ
ᱤᱸᱜᱽᱨᱟᱹᱡᱽ ᱦᱚᱯᱚᱱ ᱜᱚᱵᱚᱞ ᱨᱮ
ᱵᱤᱨᱼᱵᱩᱨᱩ, ᱚᱛᱼᱦᱟᱥᱟ, ᱡᱟᱜᱟᱼᱡᱩᱢᱤ
ᱡᱚᱛᱚᱣᱟᱜ ᱚᱱᱠᱚ ᱜᱚᱵᱚᱞ ᱨᱮ
ᱥᱟᱱᱛᱟᱞ ᱦᱚᱯᱚᱱᱹᱹᱹᱹᱹᱹᱹ ᱟᱨ ᱛᱤᱱᱟᱹᱜ ᱫᱤᱱ ᱛᱟᱦᱮᱸ ᱱᱟᱵᱚᱱ ᱜᱚᱵᱚᱞ ᱨᱮ ?
ᱫᱟᱹᱢᱤᱱ ᱴᱚᱴᱷᱟ ᱨᱮ ᱢᱮᱱᱟᱜ
ᱥᱟᱦᱮᱵᱽᱜᱚᱸᱡᱽ ᱨᱮᱭᱟᱜ
ᱵᱷᱚᱜᱽᱱᱟᱰᱤ ᱟᱛᱚ ᱨᱮ
ᱪᱩᱱᱩ ᱢᱩᱨᱢᱩ ᱣᱟᱜ ᱢᱟᱭᱟᱢ ᱠᱷᱚᱱᱟᱜ
ᱢᱤᱫ ᱵᱷᱟᱹᱭᱟᱹᱫᱤ ᱠᱚ ᱚᱢᱚᱱ ᱞᱮᱱ
ᱱᱚᱠᱚ ᱜᱤᱢᱟ ᱠᱚ ᱵᱤᱨᱼᱵᱟᱱᱴᱟ ᱭᱮᱱᱹᱹᱹᱹᱹᱹᱹᱹ!!
ᱥᱤᱫᱟᱹᱼᱠᱟᱹᱱᱦᱩᱸ ᱟᱨ ᱪᱟᱱᱫᱽᱼᱵᱷᱟᱭᱨᱚ ᱥᱟᱶᱛᱮ ᱯᱷᱩᱞᱚᱼᱡᱷᱟᱱᱚ
ᱦᱟᱨᱟ ᱭᱮᱱᱟ ᱠᱚ ᱠᱚᱱᱚᱼᱱᱚᱱᱚ ᱹᱹᱹᱹᱹᱹᱹᱹᱹ!!
ᱜᱚᱴᱟ ᱫᱤᱥᱟᱹᱢ ᱤᱸᱜᱽᱨᱟᱡᱽ ᱥᱟᱨᱠᱟᱨ
ᱡᱚᱛᱚ ᱣᱟᱜ ᱨᱤᱜᱤ ᱟᱹᱫᱷᱤᱠᱟᱨ
ᱚᱱᱟ ᱠᱷᱟᱹᱛᱤᱨ ᱦᱚᱲ ᱦᱚᱯᱚᱱ ᱠᱟᱞᱟᱝ ᱼ ᱰᱚᱞᱟᱝ
ᱚᱠᱚᱭ ᱴᱷᱮᱱ ᱠᱚ ᱦᱚᱢᱚᱨᱼᱦᱟᱞᱟᱝ ??
ᱱᱚᱣᱟ ᱧᱮᱞᱛᱮ ᱡᱟᱦᱮᱨ ᱼ ᱮᱨᱟ
ᱥᱮᱴᱮᱨᱮᱱᱟᱭ ᱵᱷᱟᱹᱭᱟᱹᱫᱤ ᱴᱷᱮᱱ
ᱵᱷᱚᱨᱟᱫ ᱠᱤᱱᱟᱭ ᱫᱤᱞᱼᱫᱟᱲᱮ
ᱡᱮᱢᱚᱱᱹᱹᱹᱹᱹᱹᱹᱹᱹᱹᱹᱹᱹᱹ
ᱫᱤᱥᱟᱹᱢ ᱫᱚᱨᱠᱚᱭ ᱠᱤᱱ ᱟᱲᱮ ᱹᱹᱹᱹᱹᱹᱹᱹ!!
ᱥᱟᱦᱮᱵᱽ ᱠᱚᱣᱟᱜ ᱠᱚᱪᱞᱚᱱ ᱛᱮ
ᱥᱟᱱᱛᱟᱞ ᱦᱚᱯᱚᱱ ᱦᱚᱢᱚᱨ ᱟᱛᱮ
ᱮᱨᱟᱼᱦᱚᱯᱚᱱ ᱜᱟᱱᱹᱭᱩᱨᱼᱴᱟᱹᱯᱩᱨ
ᱦᱤᱡᱩᱜ ᱟᱠᱚ ᱴᱟᱠᱟᱨᱼᱴᱩᱠᱩᱨ
ᱥᱤᱫᱟᱹᱼᱠᱟᱹᱱᱦᱩᱸ ᱠᱤᱱ ᱦᱩᱫᱤᱥᱟ
ᱦᱟᱯᱮ ᱫᱤᱱ ᱨᱮ ᱪᱮᱫ ᱦᱩᱭᱩᱜᱼᱟ ?
ᱦᱚᱲᱢᱚ ᱼ ᱢᱟᱭᱟᱢ ᱦᱮᱰᱮᱡᱚᱜ ᱠᱟᱱ
ᱤᱸᱜᱽᱨᱟᱹᱡᱽ ᱠᱚ ᱨᱟᱡᱽ ᱮᱫ ᱠᱟᱱ
ᱱᱚᱠᱚ ᱫᱟᱫᱟ ᱟᱵᱚ ᱨᱮᱱ ᱵᱟᱭᱨᱤ
ᱵᱟᱞᱟᱝ ᱮᱢᱟ ᱠᱚ ᱟᱹᱭᱫᱟᱹᱨᱤ
ᱫᱤᱥᱟᱹᱢ ᱦᱚᱲ ᱞᱟᱝ ᱡᱟᱨᱣᱟ ᱠᱚᱣᱟ
ᱟᱵᱚᱣᱟᱜ ᱟᱹᱭᱫᱟᱹᱨᱤ ᱞᱟᱝ ᱞᱟᱹᱭ ᱟᱠᱚᱣᱟᱹᱹᱹᱹᱹᱹᱹᱹ!!
ᱚᱰᱚᱝ ᱮᱱᱟ ᱠᱤᱱ ᱥᱤᱫᱟᱹ ᱼ ᱠᱟᱹᱱᱦᱩᱸ
ᱦᱤᱲᱤᱧ ᱠᱮᱫᱟ ᱠᱤᱱ ᱚᱲᱟᱜ ᱼ ᱫᱩᱣᱟᱹᱨ ᱦᱚᱸ
ᱱᱩᱱᱟᱹᱜ ᱨᱟᱹᱠᱤᱱ ᱫᱤᱥᱟᱹᱢ ᱫᱩᱞᱟᱹᱲ
ᱚᱲᱟᱜ ᱜᱤᱪᱚ ᱵᱟᱝᱹᱠᱤᱱ ᱨᱩᱣᱟᱹᱲ
ᱟᱛᱚ ᱼ ᱟᱛᱚ ᱫᱟᱸᱲᱟᱸ ᱣᱟᱛᱮ
ᱫᱤᱥᱟᱹᱢ ᱦᱚᱲᱠᱚ ᱡᱟᱨᱣᱟ ᱠᱟᱛᱮ
ᱞᱟᱹᱭᱟᱫ ᱠᱚᱣᱟ ᱠᱤᱱ ᱟᱹᱭᱫᱟᱹᱨᱤ
ᱚᱨᱚᱢ ᱠᱚᱣᱟ ᱵᱚᱱ ᱟᱵᱚ ᱨᱮᱱ ᱵᱟᱹᱭᱨᱤ
ᱡᱤᱣᱤ ᱪᱟᱞᱟᱜ ᱪᱟᱦᱮ ᱢᱟᱭᱟᱢ ᱟᱹᱛᱩᱜ
ᱮᱠᱟᱞ ᱵᱟᱵᱚᱱ ᱛᱷᱤᱨᱩᱜ ᱱᱤᱛᱚᱜᱹᱹᱹᱹᱹᱹᱹᱹᱹᱹᱹᱹ!!
ᱠᱮᱱᱟᱨᱟᱢ ᱵᱷᱚᱜᱚᱛᱟ ᱟᱨ
ᱢᱟᱦᱮᱥᱞᱟᱞ ᱫᱚᱨᱚᱜᱟ
ᱟᱹᱠᱤᱱ ᱨᱮᱱ ᱥᱤᱯᱟᱹᱦᱤ ᱭᱟᱱ ᱛᱮ
ᱦᱟᱲᱢᱟ ᱫᱮᱥ ᱢᱟᱺᱡᱷᱤ
ᱥᱟᱶ ᱯᱚᱱᱚᱱ ᱠᱟᱹᱭᱫᱤ ᱭᱟᱱ
ᱤᱫᱤᱭᱮᱫ ᱠᱚᱣᱟ ᱠᱤᱱ ᱵᱷᱟᱜᱚᱞᱯᱩᱨ ᱛᱮ
ᱥᱟᱢ ᱼ ᱯᱟᱨᱜᱟᱱᱟ ᱵᱮᱪᱟᱨᱤᱭᱟᱹ
ᱢᱟᱦᱮᱥᱞᱟᱞ ᱫᱚᱨᱚᱜᱟ ᱦᱟᱨᱢᱟᱫᱤᱭᱟᱹ
ᱯᱟᱰᱮᱨᱠᱚᱞᱟ ᱨᱤᱠᱤᱱ ᱧᱟᱯᱟᱢ ᱮᱱᱟ
ᱪᱮᱫᱦᱚᱸ ᱵᱟᱝᱹᱠᱤᱱ ᱨᱚᱯᱚᱲ ᱞᱮᱱᱟ
ᱥᱟᱢᱼᱯᱟᱨᱜᱟᱱᱟᱭ ᱨᱟᱝᱜᱟ ᱣᱮᱱᱟ
ᱛᱚᱞᱦᱟᱸᱴ ᱨᱮᱱ ᱵᱩᱫᱽᱜᱟᱹᱨᱤᱭᱟᱹ
ᱪᱟᱵᱟᱭ ᱛᱟᱢᱟ ᱞᱟᱝ ᱰᱷᱤᱢᱟᱹᱞᱤᱭᱟᱹ ᱹᱹᱹᱹᱹᱹ!!
ᱠᱟᱛᱷᱟᱭ ᱠᱩᱞ ᱠᱮᱫ ᱥᱤᱫᱟᱹᱼᱠᱟᱹᱱᱦᱩᱸ ᱴᱷᱮᱱ
ᱫᱤᱥᱟᱹᱢ ᱦᱚᱲ ᱡᱟᱨᱣᱟ ᱠᱚᱵᱮᱱ ᱢᱤᱫ ᱴᱷᱮᱱ
ᱵᱟᱝᱹᱭᱨᱤ ᱛᱟᱵᱚᱱ ᱪᱟᱞᱟᱜ ᱠᱟᱱᱟ ᱠᱤᱱ
ᱟᱹᱭᱫᱟᱹᱨᱤ ᱵᱚᱱ ᱩᱫᱩᱜ ᱟᱹᱠᱤᱱᱹᱹᱹᱹᱹᱹᱹᱹᱹᱹᱹ!!
ᱥᱟᱢ ᱼ ᱯᱟᱨᱜᱟᱱᱟ ᱣᱟᱜ ᱠᱟᱛᱷᱟ ᱥᱮᱴᱮᱨᱮᱱᱟ
ᱥᱤᱫᱟᱹᱼ ᱠᱟᱹᱱᱦᱩᱸ ᱠᱤᱱ ᱨᱟᱝᱜᱟ ᱣᱮᱱᱟ
ᱞᱳᱞᱳ ᱼ ᱢᱟᱭᱟᱢ ᱦᱮᱰᱮᱡ ᱮᱱᱟ
ᱡᱟᱦᱮᱨ ᱮᱫᱟᱭ ᱪᱷᱟᱱ ᱮᱱᱟ
ᱴᱟᱢᱟᱠ ᱼ ᱥᱟᱠᱣᱟ ᱥᱟᱰᱮ ᱭᱮᱱᱟ
ᱩᱯᱤ ᱞᱮᱠᱟ ᱦᱚᱲᱠᱩ ᱩᱰᱩᱠᱮᱱᱟ
ᱢᱤᱫ ᱧᱤᱱᱫᱟᱹ ᱵᱷᱤᱛᱨᱤ ᱨᱮ
ᱯᱟᱸᱪ ᱠᱟᱹᱴᱷᱤᱭᱟᱹ ᱨᱮᱠᱚ ᱡᱟᱨᱣᱟ ᱭᱮᱱᱟ
᱓᱐ ᱡᱩᱱ ᱠᱟᱱᱟᱹᱢᱤ ᱡᱤᱞᱟᱹᱜ
ᱡᱚᱛᱚ ᱦᱚᱲᱟᱜ ᱠᱟᱛᱷᱟ ᱢᱤᱞᱟᱹᱜ
ᱮᱠᱟᱞ ᱵᱟᱵᱚᱱ ᱵᱟᱛᱟᱣᱟ
ᱟᱹᱭᱫᱟᱹᱨᱤ ᱵᱚᱱ ᱦᱟᱛᱟᱣᱟᱹᱹᱹᱹᱹᱹ!!
ᱠᱮᱱᱟᱨᱟᱢ ᱵᱷᱚᱜᱚᱛ ᱟᱨ ᱢᱟᱦᱮᱥᱞᱟᱞ ᱫᱚ ᱠᱟᱹᱭᱫᱤᱣᱟᱱ ᱛᱮ
ᱥᱮᱴᱮᱨᱮᱱᱟ ᱠᱤᱱ ᱯᱟᱸᱪ ᱠᱟᱹᱴᱷᱤᱭᱟᱹ ᱛᱮ
ᱦᱟᱡᱟᱨ ᱼᱦᱟᱡᱟᱨ ᱦᱚᱲ ᱦᱚᱯᱚᱱ
ᱨᱟᱹᱜᱟᱹᱣᱼ ᱨᱟᱹᱜᱟᱹᱣ ᱠᱚ ᱦᱚᱦᱚ ᱠᱟᱱ
ᱟᱧᱡᱚᱢ ᱠᱟᱱᱠᱚ ᱯᱚᱱᱚᱱ ᱠᱟᱹᱭᱫᱤ
ᱛᱮᱦᱮᱧ ᱨᱟᱲᱟᱭᱤᱱᱟᱹᱧ ᱡᱩᱫᱤᱹᱹᱹᱹᱹᱹᱹᱹᱹᱹᱹᱹᱹ!!
ᱢᱟᱦᱮᱥᱞᱟᱞ ᱫᱚ ᱞᱟᱦᱟᱼᱞᱟᱦᱟ ᱛᱮ
ᱦᱤᱡᱩᱜ ᱠᱟᱱᱟᱭ ᱥᱟᱫᱚᱢ ᱛᱮ
ᱟᱯᱮ ᱥᱟᱱᱛᱟᱞ ᱚᱠᱚᱭ ᱦᱩᱠᱩᱢ ᱛᱮ ?
ᱤᱧᱟᱜ ᱦᱚᱨ ᱨᱮ ᱡᱟᱸᱜᱮ ᱫᱟᱨᱟᱢ ᱠᱚ
ᱵᱟᱯᱮ ᱵᱟᱰᱟᱭ ᱛᱮ ᱤᱧᱫᱚ ᱥᱟᱨᱠᱟᱨᱤ ᱦᱚᱲ
ᱛᱚᱞ ᱯᱤᱭᱟᱹᱧ ᱡᱚᱛᱚ ᱦᱚᱲᱹᱹᱹᱹᱹᱹᱹᱹᱹ!!
ᱨᱟᱲᱟ ᱥᱟᱶᱛᱮ ᱜᱟᱹᱨᱵᱷᱩ ᱢᱟᱺᱡᱷᱤ
ᱛᱟᱨᱣᱟᱲᱤᱭᱮ ᱨᱮᱡ ᱠᱤᱫᱤ ᱠᱮᱱᱟᱨᱟᱢ ᱦᱚᱴᱚᱜ ᱜᱤᱭᱮ ᱢᱟᱜ ᱠᱤᱫᱤ
ᱫᱚᱱ ᱼᱠᱩᱪᱩᱲ ᱢᱟᱦᱮᱥᱞᱟᱞ
ᱵᱟᱭ ᱵᱩᱡᱽ ᱞᱮᱫ ᱱᱚᱣᱟ ᱦᱟᱞ
ᱦᱚᱦᱚ ᱠᱮᱫ ᱠᱚ "ᱦᱩᱞᱼᱦᱩᱞ"ᱹᱹᱹᱹᱹᱹᱹᱹᱹᱹ!!
ᱠᱟᱹᱱᱦᱩ ᱼ ᱮᱭᱟ ᱥᱮᱛᱟᱹᱹᱹᱹᱹᱹᱹ!!
ᱟᱢᱫᱚ ᱚᱠᱚᱭ
ᱛᱤᱱᱟᱹᱜ ᱫᱤᱱ ᱟᱹᱭᱫᱟᱹᱨᱤ ᱞᱮ ᱠᱚᱠᱚᱭ ?
ᱨᱟᱲᱟᱭ ᱛᱟᱠᱚ ᱢᱮ ᱛᱚᱞ ᱵᱟᱵᱮᱨ
ᱟᱨ ᱵᱟᱝᱠᱷᱟᱱ ᱱᱚᱜᱼᱚᱭ ᱧᱮᱞᱢᱮ ᱦᱚᱲᱮᱡ ᱜᱟᱫᱟᱨ
ᱤᱧᱟᱜ ᱫᱤᱥᱟᱹᱢ ᱨᱮᱱ ᱢᱤᱫ ᱦᱚᱲᱟᱜ
ᱛᱮᱦᱮᱧ ᱠᱷᱚᱱ ᱵᱟᱢ ᱵᱚᱞᱚᱱᱟ ᱦᱚᱲ ᱚᱲᱟᱜ
ᱨᱟᱲᱟ ᱠᱚᱯᱮ ᱡᱚᱛᱚ ᱠᱟᱹᱭᱫᱤ
ᱦᱮᱞᱮᱡ ᱠᱚᱯᱮ ᱱᱚᱠᱚ ᱵᱟᱝᱹᱫᱤ
ᱛᱤᱦᱤᱧ ᱠᱷᱚᱱ ᱫᱚᱹᱹᱹᱹᱹᱹᱹᱹᱹ
ᱟᱵᱚᱣᱟᱜ ᱫᱤᱥᱟᱹᱹᱢ ᱨᱮ
ᱟᱵᱚᱣᱟᱜ ᱜᱤ ᱨᱟᱡᱽᱹᱹᱹᱹᱹᱹ!!
ᱨᱟᱲᱟ ᱥᱟᱶᱛᱮ ᱜᱟᱹᱨᱵᱷᱩ ᱢᱟᱺᱡᱷᱤ
ᱛᱟᱨᱣᱟᱲᱤᱭᱮ ᱨᱮᱡ ᱠᱤᱫᱤ ᱠᱮᱱᱟᱨᱟᱢ ᱦᱚᱴᱚᱜ ᱜᱤᱭᱮ ᱢᱟᱜ ᱠᱤᱫᱤ
ᱫᱚᱱ ᱼᱠᱩᱪᱩᱲ ᱢᱟᱦᱮᱥᱞᱟᱞ
ᱵᱟᱭ ᱵᱩᱡᱽ ᱞᱮᱫ ᱱᱚᱣᱟ ᱦᱟᱞ
ᱦᱚᱦᱚ ᱠᱮᱫ ᱠᱚ "ᱦᱩᱞᱼᱦᱩᱞ"ᱹᱹᱹᱹᱹᱹᱹᱹᱹᱹ!!
ᱜᱚᱴᱟ ᱫᱤᱥᱟᱹᱢ ᱯᱟᱥᱱᱟᱣ ᱣᱮᱱᱟ
ᱦᱚᱲ ᱦᱚᱯᱚᱱ ᱠᱚ ᱨᱟᱝᱜᱟ ᱣᱮᱱᱟ
ᱤᱸᱜᱽᱨᱟᱹᱡᱽ ᱯᱷᱟᱹᱫᱽ ᱠᱚ ᱥᱮᱴᱮᱨᱮᱱᱟ
ᱞᱟᱹᱲᱦᱟᱹᱲ ᱫᱚ ᱥᱟᱹᱨᱫᱤ ᱭᱮᱱᱟ
ᱟᱰᱤ ᱜᱟᱱ ᱦᱚᱲ ᱠᱚ ᱜᱚᱡ ᱮᱱᱟ
ᱜᱟᱰᱟ ᱫᱟᱜ ᱞᱮᱠᱟ ᱢᱟᱭᱟᱢ ᱟᱛᱩᱭᱮᱱᱟᱹᱹᱹᱹ
ᱱᱚᱣᱟ ᱜᱤ "ᱥᱟᱱᱛᱟᱞ ᱢᱟᱭᱟᱢ ᱜᱟᱰᱟ"
ᱟᱭᱢᱟ ᱦᱚᱲ ᱠᱚ ᱜᱚᱡ ᱮᱱᱟ
ᱟᱭᱢᱟ ᱦᱚᱲ ᱠᱚ ᱨᱟᱹᱯᱩᱫ ᱮᱱᱟ
ᱟᱭᱢᱟ ᱦᱚᱲ ᱫᱚ ᱛᱤᱼᱡᱟᱝᱜᱟ ᱠᱚ ᱨᱟᱹᱯᱩᱫ ᱮᱱ
ᱟᱭᱢᱟ ᱦᱚᱲᱟᱜ ᱢᱟ ᱞᱟᱡ ᱚᱰᱚᱠᱮᱱ
ᱟᱨ ᱟᱹᱰᱤ ᱜᱟᱱ ᱦᱚᱲᱟᱜ ᱫᱚ ᱵᱚᱦᱚᱜ ᱯᱚᱥᱛᱟᱜ ᱮᱱᱹᱹᱹᱹᱹᱹᱹ
ᱟᱵᱚ ᱨᱮᱱ ᱦᱟᱯᱲᱟᱢ ᱠᱚ
ᱱᱚᱝᱠᱟ ᱛᱮᱠᱚ " ᱵᱚᱝᱜᱟ ᱛᱟᱞᱟ" ᱭᱮᱱ
ᱚᱱᱠᱚ ᱜᱤ ᱱᱤᱛ ᱠᱚ " ᱵᱤᱨᱼᱵᱟᱱᱴᱟ" ᱭᱮᱱᱹᱹᱹᱹᱹᱹᱹ!!
ᱟᱹᱰᱤ ᱜᱟᱱ ᱜᱚᱜᱚ ᱛᱟᱠᱚ ᱣᱟᱜ ᱥᱤᱱᱫᱩᱨ ᱢᱮᱴᱟ ᱣᱮᱱ
ᱚᱠᱚᱭ ᱢᱟ ᱦᱟᱨᱟ ᱛᱚᱨᱟᱝ ᱨᱮ
ᱚᱠᱚᱭ ᱢᱟ ᱵᱟᱯᱞᱟ ᱛᱚᱨᱟ ᱨᱮ
ᱟᱨ ᱚᱠᱚᱭ ᱫᱚ "ᱵᱩᱲᱦᱤ" ᱠᱟᱛᱮ
ᱢᱩᱪᱟᱹᱫ ᱵᱮᱲᱟ ᱨᱮᱹᱹᱹᱹᱹᱹᱹ!!
ᱟᱹᱰᱤ ᱜᱟᱱ ᱵᱟᱞᱮᱼᱵᱮᱞᱛᱮᱧ
ᱜᱤᱫᱽᱨᱟᱹ ᱦᱚᱸᱠᱚ ᱠᱩᱣᱟᱹᱨᱮᱱᱟᱹᱹᱹᱹᱹᱹᱹᱹ
ᱟᱫᱚᱭ ᱢᱟ ᱛᱟᱲᱟᱢ ᱠᱮᱴᱮᱡ
ᱟᱫᱚᱢ ᱢᱟ ᱥᱤᱫᱩᱵ ᱠᱮᱴᱮᱡ
ᱚᱠᱚᱭ ᱢᱟ ᱟᱪᱚ ᱛᱚᱨᱟ ᱨᱮ
ᱟᱨ ᱹᱹᱹᱹᱹᱹᱹᱹᱹᱹ
ᱚᱠᱚᱭ ᱢᱟ ᱞᱟᱡ ᱨᱮᱹᱹᱹᱹᱹᱹ!!!
ᱮᱱᱦᱚᱸ ᱟᱵᱚ ᱛᱮᱦᱮᱧ ᱪᱮᱫᱟᱜ
ᱵᱟᱝ ᱡᱚᱨᱚᱜ ᱠᱟᱱ ᱢᱮᱫ ᱫᱟᱜ
ᱦᱟᱯᱲᱟᱢ ᱠᱚᱣᱟᱜ ᱟᱹᱛᱩ ᱢᱟᱭᱟᱢ
ᱮᱴᱟᱜ ᱛᱮᱫᱚ ᱵᱟᱵᱚᱱ ᱛᱟᱲᱟᱢ
ᱥᱟᱨᱠᱟᱨ ᱫᱷᱟᱹᱵᱤᱡ ᱟᱵᱚᱣᱟᱜ ᱟᱲᱟᱝᱹᱹᱹᱹᱹᱹᱹᱹ!!
ᱫᱩᱱᱤᱭᱟᱹᱹ ᱨᱮᱭᱟᱜ ᱱᱟᱜᱟᱢ ᱨᱮ
ᱪᱷᱟᱯᱟᱭ ᱢᱟᱵᱚᱱ ᱟᱜᱟᱢ ᱨᱮ
ᱛᱚᱞ ᱫᱚᱦᱚᱭ ᱢᱟᱵᱚᱱ "ᱥᱚᱱᱟ ᱦᱟᱨᱚᱯ" ᱛᱮ
ᱠᱩᱨᱩᱢᱩᱴᱩᱭ ᱢᱟᱵᱚᱱ ᱡᱚᱛᱚ ᱠᱚᱛᱮᱹᱹᱹᱹᱹᱹᱹᱹᱹᱹ!!
Found a mistake in the transcription?
Compare it with the scanned copy and
send us the correction.